نعم انه عنوان خبر وليس مزحة أو نكتة وذلك لأنه "صناعة عالمية بأيدى مصرية".. ايدين العبد لله من أحد الوكالات الإخبارية "ايون سحبوا رخصة وزير النقل فى التشيك لأنه كان سايق عربيته الفارهة كما يقول الخبر يعنى من غير ما يكون معلق اللوحة المعدنية بأرقامها وكان مكتفى بلزق ورقة على ظهرها مكتوب فيها الرقم.. وده مخالف فى جمهورية التشيك"... ههههههه بالذمة دول ناس خاصة وانهم سحبوها منه يوم فرحه وعروسته راكبه جنبه وفرحانة بيه وبالعربية الجديدة.. أخص الوحشين عكننوا عليه.. طيب مهو لزق ورقه بدل اللوحة المعدنية اما ناس بيدققوا فى الهايفة...لا تخشى ايها القارئ العزيز من خطورة الخبر لأنه غير ضار بصحة المصريين اللى أخبارهم أكثر غرابة ومن الأخر جتتهم نحست.. انه خبر كنت أنا الديسك الهمام فى موقع الشروق والذى قمت بتنزيله ولن أقوم بشرح معنى الديسك كما قلت فى تدوينة سابقة سأكتفى بأن أقول وبكل تواضع الديسك هو "اللى بيحول الفسيخ لشربات" ويعطيه للقارئ العزيز ليشربه ويبقى هو الخفاء ولا يرى القارئ سوى مقدم العصير.
ما علينا وعودة لسحب رخصة الوزير التشيكى، سيسألنى قارئ دقيق شغوف للمعرفة عدة أسئلة ليثبت لى عدم صحة الخبر وأنه فبركة صحفية وأنى من الأخر "رغاية وغاوية وش وبصدعكوا بتدويناتى"، لكن وبإعتبارى مدونة صاحبة شخصية رياضية وأقبل النقد والرأى الأخر سوف أنشر له على سطور تدوينتى أسئلته ومنها:
1- ما حاجة وزير لرخصة قيادة من الأساس وما بالك بقى بأنه وزير النقل..؟
2- ألا يملك سائق خاص ولو حتى ذلك الذى توفره الوزارة له..؟
3- كيف لسيارة وزير ألا تحمل أرقام خاصة.. وزجاج أسود وحركات..؟
4- كيف يسير وزير بدون "تشريفة" تتسبب فى زحمة مرور لا مثيل لها إلا زحمة كوبرى أكتوبر أو طريق النصر عند عبور أى كائن أن كان ذو هيبة كمسئول بحى "شمال كولالامبور مصر" وقيس على كدة بقى غيره كتير بداية من سكرتير عام ديوان مش عارف إيه وأنت طالع.. فما بالك بمرور وزير..؟
5- هل يحتاج أصلا شخص وصل فى بلاده لمنصب وزير لرخصة قيادة حتى قبل أن يكون وزير.. ده بيسوق بالفطرة وانهى بنى أدم تسول له نفسه أن يجرؤ يقوله "انت معاك رخصة يا باشا"... مهو وزير يعنى كان رجل أعمال ولا ابن مسئول بارز يعنى من اللى بيسوقوا الهبالة على الشيطانة...؟
6- مين بقى الجدع ابن الجدع اللى قال للوزير ورينى رخصتك وقول "حاحا"...؟
7- وأخيرا أزاى الوزير وافق انه يقف فى الإشارة ومكسرهاش.. يعنى عادى زى أى واحد بيكسرها ويقول انت متعرفش انا ابن مين... ياريته يقول "انت متعرفش أنا مين... عشان لما يتسأل يعرف يرد"..؟
ولأنى مدونة غلسه لن أقف مكتوفة الأيدى أمام سيل الأسئلة تلك فسأرد الصاع صاعين.. بسؤالين أقف حائرة أمامهم خاصة مع حالة اللامبالاة والعجز عن حل مشاكل الأجدر بالمسئولين عن حلها التنحى وترك مساحة لمن هم قادرين على حلها..
س1- هل يحتاج الوزير أو المسئول فى مصر أن يكون حاصل على مؤهل جامعى رغم انه تحصيل حاصل بس برضو مطلوب..؟
وأن كانت الإجابة بنعم.. إذن ما كل تلك الكوارث التى تحدث على أيدى الحاصلين على دكتوراه من جامعات أوروبا.. وللأسف لا يشعرون بفداحة ما يرتكبون أو "عاملين من بنها"..
وأن كانت الإجابة بلا.. فيا بختنا بوزرائنا ومسئولينا إللي بيتساوى فيهم المتعلم مع إللى بيفك الخط.. وفى الأخر "لا ده بيحل ولا ده بيربط"..
س2- هل يحتاج المصرى لمن ينقذه من أوضاعه المخجلة والمذرية..؟
وأن كانت الإجابة بنعم.. فلماذا الصمت والخضوع والرضى بما لا يرضى أصحاب الضمائر الحية..
وأن كانت الإجابة بلا.. فالصمت أفضل وبلاها أسئلة وتدوين والكلام ده.. ومن فضلك تزور المدونة بتاعتى لأنى مش هبطل تدوين.. رخامة من الأخر..
وللأسف لأننا فى مجتمع لا يحتاج فيه أى شخص لأى تصريح أو رخصة ويكتفى الجميع بإلحاق الأذى والإضرار بالآخرين فلن يكون النقاش حول سحب رخصة وزير نقل التشيك ذو أهمية.. فهنا ترى ما هو أغرب وما يستحق الكتابة عنه أكثر من أن القانون فوق الجميع حتى وزير النقل التشيكى اللى قرر "انه هيخلى المدام هى اللى تسوق عشان معاها رخصة".
ومتبقاش قارئ مستفز وتجرنى لكلام يخلى سلومة الأقرع يسلم عليا وعلى مدونتى الغلبانة.
ك.ك
10-11-2010
لينك الخبر على الشروق
http://shorouknews.com/ContentData.aspx?id=331722
ردحذفمعلم كارول :)
اولا ليا شوية تعليقات: الاسئلة اللى انتي طرحتيها ليها اجابه واحده حضرتك عارفاها كويس : محمد منير :))
يا كارول انا أخويا جه من أمانيا فجر النهارده.. بيقولي ايه يا عم الناس اللى هناك دي..أنا وواحد صاحبي - ألماني- هناك مستنيين نعدي الشارع فبقولّه: ياللا يا عم الشارع فاضي ومفيش عسكري.. صاحبه الألماني قاله.. أنا ميهمنيش الشارع فاضي ولا لأ.. والعسكري موجود جوانا، احنا مش عيال صغيرة عشان حد يقولنا ايه الصح او الغلط..
دي ثقافة الناس هناك..
يبقى انتي مش عايزة وزير النقل يتسحب منه الرخصة.
على رأي حسين مصطفى في مدرسة المشاغبين: يقوم ابنك انت يضحك عليا انا ويسرق عربية مدير مكافحة سرقة السيارات...
احنا في مصر يا برنس
اللى دهانا الهوا دوكو.. بس للأسف مفيش غيرنا بيشتريه
شكرا يا كارول يا جميل
صدقنى يا حجازى مش فى ألمانيا بس.. الموقف نفسه حصل لى وأنا فى الأردن شوارع فاضية لا يمكن بنى أدم ولا عربية تظهر لكن احترامهم للقانون مش محتاج مراقب...
ردحذفبس على رأيك الاجابة زى ما أحنا متفقين هى محمد منير ههههههههههههه :)
هههههههههههه مش بطلت ضحك من ساعه لما قريت .. بس بجد مش عندى تعليق غير عماااااااااااااار يامصر
ردحذفيعنى ينفع يا جوكسا بزمتك انهم يسحبوها يوم فرحه ويحرجوه قدام عروسته هههههههههههههههه.. شعب مش رقيق المشاعر زينا .. عشان كدة أحنا بنسيب المسئولين اللى المفروض نقول مجرمين يفلتوا من العقاب عشان يا حرام قلبنا رهيف
ردحذفكل حاجة "أحنا في مصر".."مفيش أمل"..."الدنيا سودا"..انا مش عندي مشكلة اننا نتقد الأوضاع السيئة - الكتير ماشي - في بلدنا، بس بلاش نسودها على نفسنا، صحيح فيه ناس فاسدة كتير جدا بس فيه ناس كويسة برضة، وبعدين ما هي دي بلدنا ومش هنرتاح لو رحنا عشنا ملوك في حته تانية وسط ناس غريبة.ارجع واقولك انا أفضل اقاتل هنا عشان احاول اخلي الأوضاع حوليا احسن،على الأقل انجح في عمل تغيير واحد ايجابي في حياتي، واني اكون مع الناس الي بحبها، تفتكري ايه طعم الدنيا وانتي في بلد تانية من غير أهلك وأصحابك وحبايبك؟ وبعدين السفر بره مش فيه اي مشكلة لو احنا هنسافر نحسن من نفسنا ونفيد بلدنا دي سواء من بره او لو رجعنا..انما ملوش اي لازمة نقول "ان الدنيا سودا"..الدنيا هنا فيها الوان كتير،احنا الي بنختار نشوف ألوان ايه...
ردحذفومش تغيبي تاني يا كارو :)
اولا شكرا يا بسوم على متابعتك وشعورك بغيابى..
ردحذفانا معاكى فعلا ان الحياة ملهاش طعم من غير الاهل والاصحاب والاحباب.. بس بيبقى صعب جدا لما تشوفى ناس من دول متبهدلين ومتعذبين زى ملايين غيرهم كتير.. فخلاص الواحد بيطق..
ولو السفر بيخلى الناس ملوك للاسف ده مش مكتوب للمصرى فى اى بلد غريب لان معدش لينا كرامة وده مش مبالغة كل الاحداث الاخيرة بتقول كدة واكتر..
انا اتمنى ان بلدى تبقى حلوة جدااااااا عشان اعيش فيها مع اللى بحبهم سعيدة ومرتاحة لان محدش بيحب الغربة..
وكتير الواحد مش بيملك غير انه يكتب وبس.. يمكن يعكس حاجة محدش شايفها فيكون حلها اسرع..
يا شيخة الناس دول عليهم شوية حاجات كدا
ردحذفعجبي
ههههههههههههههههه انا برضو قلت كدة يا لودى.. ناس غريبة أوى وبتحبكها على حاجات هايفة
ردحذف