لا تقولي بات مان وسبايدر مان.. أنا عايزة الهيرو بتاعي بتنجان

لا أعرف السر وراء أن أبطال الخوارق عادة ما بيكونوا إمتدادا لكائنات آخري أستمدوا منها صفاتها وقوتها اللي بتخليهم خوارق.. وقد تكون الإجابة الأنسب من وجهة نظري هي أن الخوارق دول من وجهة نظر مؤلفيهم أقرب إلى الكمال الجسدي.. بمعني أن محدش يقدر عليهم.. والإنسان بطبيعته أبعد ما يكون عن ده.. بس لأن الطيور والحيوانات بيتميزوا بصفات جسدية خرافية بمقارنتها بنظيرتها عند الإنسان هنلاقي الفوارق خارقة.. بالإضافة لصفات جسدية موجودة في الكائنات دي ومش موجودة عند الإنسان.. زى البصيرة الحادة والسرعة والقدرة علي تغيير لون الجلد وغيرها...

وفوق كل ده أن البنات دايما بتتهطل علي الفتوات الأبطال إللي فيهم صفات غريبة وأقوياء وبيتبرعوا وينقذوا البشرية.. ده غير أن البطل ده كل البنات هتموت عليه.. لكن هو ساب كل ده وقرر وأختار أنه يموت في حبها هي ويتبهدل عشانها.. وتتخطف من الوحشين الشريرين وهو يروح ينقذها ويقولهم.. لا.. كل الستات آه.. لكن حبيبتي لأ.. أنتوا فاهمين يا كلاب.. وبعد ما ينقذها علي آخر لحظة ينقذ باقي البشرية من الوحش الكاسر..

وفي الحقيقة لو واحدة شافت حبيبها بيمد إيديه يساعد بنت مثلا.. هتمسكه من قفاه وتخلي يومه أسود وتقوله أنت هتتلكك ما في ألف واحد غيرك موجودين ولا أنت اللى عرق الشهامة نفض عندك.. ولو راح يساعد راجل هتقوله يعنى حبكت في الخروجة اليتيمة إللي بتخرجهانى تدبسنا فى النيلة دي.. من الآخر ملكش دعوة بحد وأنت معايا.. إمال هيرو أزاي بس يا بنتي.. ما علينا..

وكلامي عن إختيار كائنات بعينها مش محاولة لتحليل وتفسير هذا علميا.. لأن له فى خلقه شئون.. لكن بتسائل عن كون "السوبر هيرو" إمتداد لكائنات منها إللي بتقزز منه ومنها إللي بخاف منه.. وده مش حالي لوحدى ده حال ناس كثيرة..

مثلا "Spider man" سبايدر مان أو الرجل العنكبوت.. ليه العنكبوت يعني أنا مثلا جسمي بيقشعر لما بشوفه.. وأنا طبعا بتكلم عن الحجم النونو إللي بنشوفه في بيوتنا ومقدرش أتخيل لو شفت الجامبو بتاعه ممكن أعمل ايه.. ده غير الخيوط الملزقة اللي هتفضل طول النهار تخرج من إيديه وهو بيشاور.. وخدي من كدة طول النهار فك وتسليك العقد إللي هتكلكع منه.. ده غير التنفيض عشان خيوط العنكبوت عادة بتجيب الفقر زي ما أهالينا ربونا وقالوا لنا كدة..

أو "Bat Man" بات مان أو الرجل الوطواط.. الوطواط بذمتكوا ده كائن أفرح أوي أن بني آدم بقي سوبر هيرو وإمتداد ليه.. يا ساتر.. خاصة وأني بتقزز من شكله جدا.. ويبعث عليَ كآبه.. ده غير أنه كائن ليلي.. يعنى يقعد بروطة طول النهار.. ويصيع طول الليل.. مهى طبيعته كدة..

والخارق أيضا "The Iron Man" ذا آيرون مان أو الرجل الحديدي طيب يعنى خلاص كل المعادن خلصت ومتبقاش غير الحديد.. وفوق كل ده الرجل الحديدى يعنى ناشف ومقيح وبارد وممكن يصدى ويقرفنا.. ايه يعني هو عشان يبقى جامد لازم يكون حتة حديدة.. ولما الدنيا تقفلها فى وشنا وميتبقاش غيره.. نقول ما خلاص بقينا علي الحديدة.. بعد ما كان السوبر هيرو إللي كل البنات هتتجنن عليه..

وأخيراً وليس آخراً "Hulk" الرجل الأخضر.. طيب أنا مش هتكلم قولوا أنتوا يعنى ايه لزمتها عشان يبقى سوبر هيرو يتقلب فجأة ويبقى حلة ملوخية ولا حزمة برسيم.. ماله الفوشيا كميل برضو.. ويبقى عندي أنا الرجل الفوشيا.. وجارتي الرجل الأزرق.. وأختي الرجل الأصفر.. وهكذا ومش بعيد زى ما يبقوا ألوان يبقوا مقاسات.. يعنى أنتي عايزاه لما يتظرظر وتطلع في دماغه أنه يبقي سوبر هيرو دلوقتي يتحول يبقى فى حجم عمارة واحدة ولا 3 عمارات ولا برج القاهرة..

أنا مش ضد الخيال.. ومش ضد الأبطال الخوارق.. بس نستنضف شوية الكائنات اللي بنختارهم.. وطبعا لا أقصد أني أهين أي كائن لا سمح الله.. لكن هى نفس وأذواق..

بس في رأى أن لكل واحدة سوبر هيرو خاص بيها مش بيتكرر زيه.. والخوارق إللي بيعملها عشانها مختلفة عن أي خوارق تانية أي حد تاني بيعملها لحبيبته.. وهي نفسها مش بتبقي مستنيه أي خوارق غيرها.. وكمان مش بيهمها سواء كل البنات هتموت عليه ولا لأ.. كفاية أنه هو بيموت فيها.. لأن في نظرها هو السوبر هيرو بتاعها ومش شرط يكون بتاع الدنيا كلها.. حتي لو في الآخر بيتحول لبتنجان مش لسبايدر مان ولا بات مان.. كفاية أنه يبقى البتنجاناية إللي هي بتحبها..

ك. ك
11 – 6 - 2011