انا تخيلت ان انصار ابو اسماعين هيتقلبوا عليه لما يكتشفوا أن
مرشحهم وشيوخ السلفيين خدعوهم وساقوهم زي القطيع عشان يقولوا نعم للإعلان الدستوري
بحجة أنها نصرة الشريعة.. وعشان مش يجي رئيس يحكم مصر ويكون جاسوس وحش زي البرادعي
زي برضو ما فهموهم.. وأن كل ده مطلعش حقيقي وكان حشدهم لقول نعم مجاملة للعسكري وكيد
في الليبراليين والعلمانيين مش أكتر.. وعشان
المسيحيين الزنادقة عايزين يلغوا المادة الثانية من الدستور..
لكن فوجئت انهم بعد ما اكتشفوا كل الزيف ده.. وأن نعم اللى قالوها
دي ليس لها علاقة بنصرة الشرعية لا من قريب ولا من بعيد.. ولا مساس بالمادة الثانية
من الدستور.. خرجوا يطالبوا بالغاء المادة 28 من الاعلان الدستوري وبيطالبوا بترشيح
ابو اسماعين حتى لو امه امريكية..
طيب انتوا لغيتوا عقلكوا ماشي.. عايزين رئيس لمصر امه تحمل جنسية
دولة انتوا عايزين تجاهدوا ضدها ماشي مش مشكلة برضو.. لكن مضايقتوش للحظة أن مرشحكوا
والشيوخ كذابين.. وزجوا بالإسلام في معركة وهمية وحشدوكوا للدفاع عنه.. لكن الحقيقة
كانت عملية الحشد لنيل رضي العسكري.. هل إرضاء العسكري أغلي وأهم من الشريعة.. وهل
رضي العسكري عن مرشحكوا..!!
خرجتوا حرقتوا الاعلان الدستوري في محرقة فى التحرير الجمعة
20 أبريل 2012.. ازاى تحرقوا إللي اعتبرتوه يوم 19 مارس 2011 كلام منزل من عند الله..
وخرجتوا آلاف تحتفلوا فى الشوارع بالنصرة في غزوة الصناديق علي العلمانيين الكفرة والمسيحيين
الزنادقة..!!
خرجتوا دلوقتي تقولوا يسقط حكم العسكر.. مش هما دول العسكر إللي
انتوا برضو خرجتوا آلاف تقولوا يا حلاوته يا جماله بعد الإعلان الدستوري.. ولا عشان
لقيتوا أن العسكري مظبطش مرشحكوا زي ما انتوا ظبطوه في غزوة صناديق الاعلان الدستوري..
عملاً بمبدأ لقمة قصاد لقمة.. خرجتوا تقولوا له هات اللقمة اللى عليك.. العسكري مش
بيأكل حد في بقه.. ولا نسيتوا عبد العال لما قال لمراته سكينة لما أكلك بإيديا أكل
أنا بإيه.. يا ساتر..
من يعيش بلا مبدأ يظل هكذا بلا هوية.. وانتم بلا مبادئ..
ومن يستغل الدين واسم الله بهذه الصورة المقززة لنيل أغراضه ومطامعه.. يظل هكذا بعيداً عن الله.. والدين
برئ منه..
وبالرغم من كل هذا ترفعون شعار سنحيا كراما.. أي كرامة تتحدثون
عنها..!!
ك. ك
21 – 4 –
2012
ردحذفأم أبو سماعين يا كارول.. انتي عارفة، عندنا في البلد مثل بيقول: "الوِلْد الخـ*ة" يجيب لأهله اللعنة".
الله يحرق السبب في كل اللي بيحصل ف البلد
حاجة بجد مستفزة ولا تدعو لاي تعاطف التخريب والتظاهر بدون مبرر حاجة تخلي الواحد عايز يطفش من البلد
حذف