بما أن المشير "معندوش معلومات عشان مكنش حاضر"، والمخلوع مبارك "ميعرفش حاجة عشان مكنش حاضر برضو"، والعادلي "مش هو إللي أدي أوامر عشان برضو برضو مكنش حاضر"، وقيادات الشرطة "مش هي اللي ضربت الرصاص لأنها للأسف مكنتش حاضرة"، والظباط "مش هما إللي عمروا البنادق وقتلوا المتظاهرين عشان مكنوش حاضرين مع إللي حاضرين"، فده يؤكد بالدليل القاطع أن محدش كان حاضر الثورة، وكان حلم جماعي، وأن كل المجرمين المتهمين إللي في المحاكمة حاليا وشهود النفي كلهم كانوا بيعملوا "تان" في شرم الشيخ في فيلا مبارك.لكن في قتلي، وفي شهداء، وفي رصاص، وفي أوامر، وكلها الوحيدة إللي كانت حاضرة، والسؤال هو كمان حاضر مين إللي أدي أمر القتل وضرب الرصاص..؟، لكن للأسف الإجابة هي كمان مش حاضرة، وعليه فقررت أجاوب أنا "بسم الله الرحمن الرحيم.. الإجابة هي أن إللي قتل الثوار فى التحرير وفي محافظات مصر هو القرش الشرير الوحش بتاع شرم شيخ.. فاكرينه!!".. وبالهنا والشفا...
القرش الوحش بتاع شرم الشيخ إللي لغاية إنهاردة محدش عارف هو راح فين، لأن القرش إللي اتقبض عليه أعترف أنه هو مش هو إللي كان بيعض السياح، هو المجرم القاتل صاحب أوامر إطلاق الرصاص علي المصريين وهو برضو إللي عمر البنادق وهو برضو برضو إللي ضربهم، وكمان هو القناصة ايه رأيكوا بقي.
نص التدوينة القديمة بتاريخ 12 ديسمبر 2010:
تعانى مصر مؤخرا من عدة أزمات أهمها هجومات الفك المفترس فى شرم الشيخ ولأن عملى بالصحافة المصرية جعلنى منطقية إلى حد كبير ولماحة إلى أبعد الحدود وأفهمها وهى طايرة وأقرأ اللى بين السطور قدرت أتوصل بذكائى الغير محدود إلى تحليل منطقى لما تمر به مصر..
زادت الأقاويل مؤخرا وغير معلوم السبب الحقيقى لهذه الهجمات الغريبة من قبل بعض أسماك القرش لسواحلنا العزيزة ولكن هناك رؤى وتخمينات ومنها:
1- قروش إسرائيلية أرسلتها تل أبيب لمهاجمة السواحل المصرية فى عملية مخططة لضرب السياحة وجذب السياح من شرم الشيخ إلى شواطئ ايلات الإسرائيلية اللى خلاص مش لاقيه سياح وعايزة تاخد اللقمة الطرية اللى فى بق المصريين
2- قروش إسرائيلية برضك مهى دى الجنسية الشائعة دلوقتى ألقتها طائرة إسرائيلية برضك لتنفيذ عملية مجهولة حتى الآن ونبهت عليهم اللى يتقبض عليه ميقولش أسمه الحقيقى ويقول انهم ضفادع بشرية ألقتهم طيارة ومشيت وسابتهم عشان الطيار مراته عملاله ملوخية وهتبرد.. لكن للأسف القرش اللى تم القبض عليه السلطات مسابتلوش فرصة انه يقنعهم أنه ضفدعة بشرية ومركبة زعنفة الفك المفترس..
3- قروش إسرائيلية _ ومحدش يقول إيه الجديد _ كانت فى رحلة الهجرة الشتوية وبدل ما تدخل إسرائيل دخلت بالخطأ السواحل المصرية ولأن مش معاها بطاقة التموين المصرى فمعرفتش تاخد حصتها من السلمون المدخن اللى نازل جديد على البطاقة فقررت أن لا شئ يعلو على نداء الحياة وهاجمت السياح الأجانب وقالت أهو برضك نعمل بأصلنا ومنهاجمش المصريين اللى أستضفونا فى شواطئهم..
4- بسم الله الرحمن الرحيم نقول برضو قروش إسرائيلية من اليمين المتطرف ومبيعجبهاش الحال المايل فقررت مهاجمة السياح الأجانب فى شواطئ شرم الشيخ لتعلن رفضها لحالة العرى الغير مبرر فقررت تلقين المصريين وشواطئهم وسياحهم درسا حيث تم ملاحظة أن القرش كان مربى ذقنه وفق أحد المصادر الموثوق فيها..
5- مهو مفيش غيرها قروش إسرائيلية شافت أن مستوى السياحة فى مصر مبقاش أد كدة خاصة وأن معظم السائحات اللى بتنزل المية فى الخمسين وأنت طالع فقررت أنها تعلن رفضها والمطالبة بتخفيض سن السائحات والدليل ان السائحات اللى تمت مهاجمتهم مش أقل من 65 سنة وده يدل على أن القرش كان بينقى مش عشوائى وأهوج زى ما اتهموه..
لما كتبت التدوينة دي كنت في حالة إستفزازية فظيعة، لأن المسئولين الحلوين وقتها قالوا إن إسرائيل هي إللي بعتت القروش دي عشان ضرب السياحة، وخلوا المصريين أتلهوا في حكاية إسرائيل وكراهيتهم ليها والأدهي أنها بتبعت قروش كمان، وللأسف المسئولين المصريين زى ما هما مش بيتغيروا حتي لو النظام أتغير، وشغلوا المصريين في حكاية إسرائيل برضو، وتحولت السفارة الإسرائيلية إلي الشغل الشاغل، وتسبتت في محاكمة عدد من المدنيين محاكمات عسكرية، وفي النهاية كلها مؤامرات مدبرة لإلهاء الشعب.
وأظن بقي كدة أحنا عرفنا مين إللي قتل الثوار يا مصريين يا حلوين، لأن السناريو ده مش قديم علينا، احنا بس إللي بننسي، وفي الأخر كلها قروش، وكلها شرم الشيخ، وكلهم مسئولين وحماة ومدافعين عن هذه القروش التي لا تموت ولا تتهم بشئ حتي وأن كانت أفواها لسه دم الضحايا مبردش فيها، وكل لبيب بالإشارة يفهم، عشان حظر النشر بس.
ك. ك
25- 9 - 2011
