مذكرات مبتئسة في عالم الصحافة.. ج3

الجزء الثالث: كوكي الصحفية اللامعة.. بخ

وبالفعل يحيا العدل.. يحيا العدل.. كلمونى.. ولأن أختى العزيزة هى أكثر قرائى إعجاباً بيا.. وكانت وقتها الوحيدة.. لأن أخويا كان بيتخنق مني.. وماما بتنام في النص.. أو بتزعق لي لو حست أني بتكلم عن أي حد فيهم في القصص.. بس منكرش انها كانت بتشجعنى جدااا.. وأخيراً بابا إللي كان بيبقي معجب جداااااا باللى أنا كتبته في الأول وتبدأ مرحلة النقد لتغيير كل إللي كتبته عشان بابا شايف أن كدة أفضل.. بس برضو هو ليه الفضل أني حبيت القراية جدااااااااا.. وأني كتبت.. شكرا بابا.. وشكرا أسرتي الكميلة..

المهم قررت أختي مشاركتى طريق الكفاح وحضور جلسات التأهيل الصحفى كما أعتقدت وقتها.. لكنه كان كورس ثقافى.. رغم أن أسمه فى الإعلان مكنش كدة.. ما علينا.. لن أنكر حقيقة أنى أستفدت منه ثقافيا.. ودفعنى أن أقرا كتير وقتها فى الفلسفة وتاريخ الشعوب وغيرها.. وكمان جت لي الجرأة لأول مرة أقرأ قصة قصيرة من إللي أنا بكتبهم قدام الناس.. طبعا أتلخبطت كتير.. وعرقت ووشي بقي شكل الطمطماية.. لكن أختي الحلوة كانت بتبص لي وتشجعني بعنيها أني مخفش واكمل.. والغريب أن قصتي أثرت في كل الموجودين ومنهم إللي عنيه دمعت.. صراحة حسيت كدة أني عملت أكبر إنجاز في حياتي.. لأن الدموع هي مقياس نجاحي..

لكن وبرغم كل الحاجات دي.. والتشجيع أني أكتب.. إلا أن تجربتى القصيرة بهذه الجريدة خيبت أمالى كلها فى عالم الصحافة.. وفقدت الأمل فى أنى أصبح صحفية.. واخد الكارنية.. أصل حلم كارنية نقابة الصحفيين ده بيكون الهدف الأول إللي الصحفي بيجري وراه.. المهم فقدت كمان رغبتى فى إنهاء هذا الكورس الثقافى.. خاصة بعد ما قدمت شغل كتير فى محاولة لنشره بصفحة الشباب..

لكن كنت بتصدم لما بلاقى مواضيع عبارة عن نسخة من موسوعة ويكيبيديا أو مواضيع أرشيفية نازلة فى مساحات كبيرة ومتكررة كل أسبوع بعناوين مختلفة والمضحك أنها بتحمل نفس الأسامى.. يعنى صاحب الموضوع مكلفش خاطره يعمل سيرش على النت ويجيب موضوع تانى من ويكيبيديا برضو عشان ميتعبش أوى.. هو كل اللى بيعمله بيغير العنوان.. ورئيس الصفحة مبيكلفش خاطره يشوف ده متكرر ولا لأ.. لكن كتر خير مخرج الصفحة اللى كان بيرسمها هو اللى بيتعب لأنه كان بيغير مكانها كل مرة ويمكن يكون بيغير الصورة.. وكتر خير سكرتير التحرير اللى كان بينسى المواضيع اللى قبلها من رؤساء الصفحات ونزلها كل مرة..

أنا بقى كنت بتغاظ أكتر عشان كل ما ابعت موضوع يقولوا لى هينزل الأسبوع الجاى.. واستنى.. وبابا يستنى.. وماما تستنى.. وأختى قارئتى الشغوفة تستنى.. رغم أنها قرت الموضوع قبل ما ينزل.. بس هى مستنية تشوفوه باسمى فى الجورنال.. وأصحابى اللى قلت لهم هينزل لى حاجة الأسبوع ده يستنوا.. وينزل الجورنال.. والموضوع مينزلش..

ولما سألت بكل جرأة هو انتوا ليه مش بتنزلوا لى مواضيع.. ده فلان ده مثلاً كل مرة بتنزلوا له وكل كلامه من على النت وويكيبيديا.. إنما أنا بقرا كتب وبعمل سيرش عشان أدعم اللى بكتبه.. وكان ردهم هو المسمار الأخير فى نعش حلمى الصحفي.. لأنهم قالوا لي وبكل ثقة وكأني متخلفة.. يعني سؤال أهبل من شخصية تافهه علي رأي القرموطي.. إللي بينزل لهم مواضيع دول أقارب ومعارف رئيس التحرير ورؤساء الصفحات.. وهما بس اللى بينزل لهم..

وبنفس البلاهة سألت تاني يعنى ايه!!.. التكوين الصحفى ده بمبة.. والصحافة الجادة الحقيقية أفتكاسه.. وأنا موهومة وجيت العاصمة على سراب.. ولقيت أنها مش فارقة بقى.. بلا كورس بلا ثقافة بلا هم وسفر كل أسبوع عشان أحضر الحلقة النقاشية.. لأن في الأخر مش هيتنشر لي حاجة.. وأن الجريدة دي هي حلمي ومفيش غيرها في مصر تاني.. أوووبس.. سوري يا جماعة... أقصد مفيش في القاهرة غيرها..

والصحافة طلعت لا هي القلم الحر والإبداع والمصداقية والموهوبة ولا حاجة من الكلام الجميل ده.. واسمي إللي كان بيلعلط وحواليه فرعين نور في أكبر الصحف في أحلامي راح وأخده الوبا.. وقررت أن أعود منهزمة.. أجر الخيبة إللي بالويبة.. لكن..

ك. ك

4 – 6 - 2011

ملحوظة: كل الأحداث التي تم ذكرها حقيقية.. وما تمنيت أن يحدث قمت بتوضيح أنه كان حلم أو أمنية ولم يقع بالفعل.. كما أن اسماء الأشخاص وبعض الأماكن قمت بتغيرها لأسباب شخصية..