ياريت الناس كلها الحاج سعيد.. شكراً

علي مدار أكثر من أسبوع وأنا بحاول إنهاء بعض الأوراق الخاصة بوالدي من احدي المؤسسات الحكومية وذلك بناء علي توكيل عام منه لي.. وطبعا خطوة التوكيل العام دي جت بعد تفكير عميق وخوف أعمق من جانب بابا حبيبي إللي تخيل أني ممكن اعمل زي الأفلام العربية إللي الواد الشرير يستغل التوكيل بتاع أبوه ويشلطه ويخليه على الحديدة.. وكمان بعدها يبيعه الحديدة.. المهم القصة تبدأ من عند هذه المؤسسة الكبيرة إللي المفروض أخلص منها الورق..

الزيارة الأولي.. استقبلني الموظفين وكأني كائن فضائي لعل شكلي خدعهم وظنوا أني طفلة صغيرة.. لكن بطاقتي وتوكيل بابا كان بيخليهم يصدقوا أني كبيرة كفاية.. رغم أني مش رايحة بضفاير.. المهم علي ما أخدت رد مفيد كنت لفيت كل المكاتب رغم أن الإجابة كانت ممكن تبقي من أول مكتب.. لكن أزاي موظف حكومي يريح مواطن قرفان في عيشته أصلاً.. رجوعاً للإجابة إللي أنا عرفتها بطلوع الروح.. وقعت تحت رحمة موظفة.. يعني أنثي.. والواحدة تقع تحت أيد عشماوي ولا تقعش تحت رحمة موظفة مؤنثة زيها.. وحتي يومنا هذا معرفش ايه السبب..

المهم أن الموظف إللي كان معاها فى المكتب.. لقيته ملتحي وبيقولوا له يا حاج سعيد.. ولأني تصرفت بعنصرية ملحوظة تجنبت الكلام معاه.. خوفاَ من أنه يحرجني من ناحية.. عشان الفكرة أن الملتحين أو أصحاب لقب حاج مش بيكلموا ستات عامة.. فواحدة سافرة زي أكيد مش بعيد يرموها من الشباك.. لكن لأن الله مش بيرضي بالظلم وسوء النية.. وجدت دفعة حنان وابتسام من الأستاذ سعيد.. إللي سألني أنا جاية من أين.. ولما لقي ورقي من المحلة تخيل أني جاية من السفر.. فقالي أتفضلي اقعدي.. وانا اعتذرت فأصر بشدة.. وخلاني أقعد في المكتب إللي ممنوع علي المواطنين دخوله لأنه خاص بالموظفين الكبار.. وعشان ربنا يكسفني أكتر.. الحاج سعيد قام بنفسه يخلص لي الورق كله.. لدرجة أني مكنتش مصوره البطاقة فأخدها وصورها لي بنفسه.. كل ده قدام دهشة الموظفين أن رئيسهم بيخلص ورق لمواطنة بسيطة مش جاية بتوصية من حد مهم..

والموظفة إللي حطيت لي كل العراقيل الممكنة والغير ممكنة.. قدام موقف الحاج سعيد.. تحولت من متوحشة إلي أم حنون.. فاستغربت بشدة لما هي جواها إنسانة كويسة كدة وحنونة فعلا ليه بتصدر الوش الخشب والناس مش مستحملة أصلاً..

انتهي الحاج سعيد من الإجراءات إللي المفروض أعملها أنا.. والابتسامة والكلمة الطيبة مافرقتوش لحظة.. تم تحديد يوم الأسبوع إللي بعده عشان أستلم الورق.. ومشيت وسط سلامات ودعاوي الحاج سعيد أن ربنا يسترها معايا ويوفقني..

الزيارة الثانية إللي كانت صدمة.. وصلت في الميعاد المحدد ولقيت أن الورق مخلصش أصلاً.. فجريت علي الحاج سعيد إللي أول ما شافني رحب بيا جدا.. وقالي حمدالله علي السلامة.. وسألني أخبار الورق ايه.. ولما عرف أن الورق مخلصش.. اتنرفز جدااا.. وقلب الدنيا وعرف التقصير جيه من اين.. وأدي أوامر أن الورق يخلص حالاً.. فقالوا له مستحيل ده محتاج أسبوع.. فقالهم والبنت دي مش هتروح من غير ورقها أنهاردة.. بجد بأمانة كنت هبكي لأني حسيت بأبوه فظيعة ناحيته.. المهم أخدني مكتب خدمة المواطنين.. ولله الحق المكتب يشرح القلب لأنهم أصلاً مش بيسمحوا للمواطنين أنهم يقعدوا فيه كتير..

قعدت علي الكرسي أتفرج علي الناس وأيدي علي خدي.. عدي الحاج سعيد عشان يتوضأ لصلاة الظهر.. وشافني كدة.. فدخل وقالي متزعليش الورق هيخلص وهتروحي لبابا بيه إنشاء الله.. وبلاش تكشري كدة.. وسبني وراح يصلي.. وهو راجع قالي تشربي ايه.. قلت له شكرا.. فقالي لأ أحنا لازم نفطرك.. وفعلا طلب لي شاي وبسكويت.. كل ده والموظفين فاكرين أني قريبته.. بس مش قادرين يربطوا الصلة بين الحاج سعيد والمواطنة القبطية دي.. ساعتين بالظبط كان ورقي خلص والحاج سعيد بنفسه جابهولي.. ودعي لي وأنا شكرته بشدة وكان نفسي أسلم عليه يداً بيد.. لكن بصراحة أحرجت.. لكن قلت له ربنا يكرمك يا أستاذ سعيد علي كل إللي عملته معايا.. فابتسم إبتسامه لن أنساها أبداً.. ابتسامة صادقة وحنونة..

شكراً لأنك أحرجتني وكشفت لنفسي سوء نيتي.. وياريت الناس كلها الحاج سعيد

ك. ك
18 – 10 – 2011