21‏/11‏/2011

براءة صهيون من جرائم مصريون


عارفة أن الدنيا مولعة.. والناس مش مستحملة حد يتفلسف أو يتفزلك عليهم.. لكن في حاجة محيراني جدا جدا جدا.. ومستغربة أن محدش واخد باله منها.. لكن طبعا بما أني متميزة وبحب أطلع القطط الفطاسنة في أي حاجة.. وأوقات كتير المش فطسانة.. وده لأني بحاول دايماً أشوف السبب النفسي ورا كل حاجة بتحصل حواليا.. وعادة مهببة هي محاولاتي الدائمة في تحليل الناس نفسيا والتوغل في أعماقهم.. فما بالكوا بظاهرة مفجعة زي إللي بتحصل في ميدان التحرير من يوم الجمعة 18 نوفمبر لغاية دلوقتي..

مذابح دموية مخطط لها.. الشرطة والشرطة العسكرية وقوات الجيش.. إللي هما كلهم جنسيتهم مصريين حتى الجد الخمشتاشر.. بيضربوا بالرصاص المطاطي والقنابل المسيلة للدموع والخرطوش ومؤخرا الرصاص الحي مصريين تانيين بس عزل ومصريتهم برضو حتى الجد الخمشتاشر.. والكارثة مش بس في ضربهم.. لأ.. الكارثة هو في الحالة النفسية البادية عليهم.. وهي تتراوح ما بين كراهية مفرطة وغل دفين في معاميق نفسويتهم.. بالإضافة إلي استمتاع غير عادي وتلذذ غريب وتفنن في تعذيب المتظاهرين وقتلهم والتمثيل بجثثهم.. وضرب الموتي بالجزم والعصي بكل وحشية.. وأخيراً إلقاء الجثث علي أكوم الزبالة.. رغم أننا الشعب إللي كاتب علي عربيات نقل الموتي "سيارات تكريم الإنسان".. لأن عندنا إكرام الميت دفنه مش رميه لكلاب السكك..

من أين جاب المصريون دول أي كان الهيئة المجندون فيها سواء شرطة أو شرطة عسكرية أو الجيش كل الكراهية والغل والقسوة في تعاملهم مع أخوانهم وشركائهم في الوطن حاملي الجنسية ذاتها "مصري".. أزاى تحول هذا المجند بقدرة قادر لهذا الكائن السادى.. مهما كنت الأوامر إللي هو واخدها أزاي مفكرش للحظة أن ممكن اخوه أو جاره أو حد قريبه تلعب الصدفة دورها ويكون متواجد في التحرير وبأيده هو يقتله.. أزاى هيعيش مع الذنب ده طول حياته وأزاى هيسامح نفسه.. ده لو أتعاملنا بمنطق الأقربون أولي بالمعروف.. يعني انه مش هيفكر في أي مصري تاني إلا لو بيربطه بيه صلة دم.. لكن دي حتى كمان مجتش في بالهم..


منظر غريب في هذا الفيديو وهو طاقة الشر والكراهية إللي بيتصرف بيها العساكر "المصريين" مع المتظاهرين "المصريين".. مش هسأل ايه هى الأوامر إللي هو اخدها.. وان فئة الأمن المركزي دول بيختاروهم علي أساس الغباء.. وهذا الكلام المتداول عنهم.. لكن هسأل أين آدميتهم.. أين نخوتهم.. أين انتمائهم لأخوة وشريكه في الوطن وشعوره بالهم المشترك.. والمؤلم أكثر هو المنظر البشع لجنود الأمن المركزي وهما بيضربوا بنت في التحرير بصورة مقززة ومهينة ومخيفة أين الرجولة.. يعني مبقاش في آدمية ولا رجولة ولا أي حاجة تقول أن دول بشر..

كنا بنقول الصهاينة المتوحشين والمذابح القذرة في حق الفلسطينيين.. مع كامل احترامي للقضية الفلسطينية وشهدائها.. لكن هرجع وأقول ده صراع قديم علي أرض ووطن وكلام كبير.. من الأخر لا يكن أي منهما مشاعر طيبة للأخر.. وأنا بتكلم عن الصهاينة وليس اليهود بشكل عام.. عشان كدة الناس في مصر والوطن العربي لما بيشوفوا جريمة بشعة بيقولوا علي المجرم شوفوا الصهيوني عمل ايه.. انهاردة حد يقدر يقول علي مرتكبي مذابح التحرير صهاينة.. مظنش.. لأن إللي ضرب النار والقنابل المسيلة للدموع منتهية الصلاحية وغيرها التي قد تعد محرمة دوليا هو مصري أبن مصري.. وهنا الجريمة أكثر بشاعة ووحشية.. بالإضافة إلي أنها غير مبررة بمعني أن المصري الأعزل ده مكنش بيهدد حامل البندقية.. والمسلح هو إللي هجم علي الأعزل ودفعه للدفاع عن نفسه بالطوب.. بالضبط مثل الانتفاضة الفلسطينية وأطفال الحجارة.. ففي رأي أن كل جندي مصري أطلق خرطوشة علي مصري هو أكثر حقارة ودناءة من العساكر الصهاينة.. وصهيون بريئة من بشاعة هذه الجريمة المصرية الخالصة..

هل عايزين يقنعونا أن جنود الأمن المركزي ومجندين الشرطة العسكرية عايشين ميت فل وأربعتاشر وبيروحوا مارينا في الصيف وأسوان في الشتا.. عشان كدة حاسين أن تمرد الشعب ومظاهراته دي وحشة كخة وعلي أساسه بيعاملوهم بالوحشية دي.. ده اللجنة الدولية للصليب الأحمر من أهم مبادئها هو معالجة الجريح حتى وأن كان من صفوف العدو رغم أن أصلا معندهمش تعريف عدو.. ومين طيب ومين شرير.. لكن أقصد أنهم بيعالجوا الجميع وبيبذلوا حياتهم عشان أي حد حتي اللى الناس ممكن تكون شيفاهم مجرمين.. لكن هي بتتعامل مع الجريح كإنسان محتاج مساعدة.. فأزاي أي بني آدم يفسر ضرب الأمن المركزي للمستشفي الميداني إللي كله جرحه وبيعالج مصريين بقنابل مسيلة للدموع.. ده لو الجيش المصري بيحارب محرم عليه دوليا وطبقا للقوانين والمعاهدات ضرب المؤسسات الخدمية وخاصة المستشفيات.. يعني لو الجندي المصري بيحارب إسرائيليين مش هيضرب نار علي مستشفياتهم مهما كان متغاظ منهم وبيكرههم وفي حالة حرب.. فأزاى هانت عليه حرمه جرح ودم أخوه المصري إللي مش محتاج معاهدات دولية تقوله ممنوع تضرب مستشفي.. ولا لأنها حاجة محرمة إنسانيا وأخلاقيا ودينيا.. ده لأنها حرمة دم واخوه..

هل ممكن حد من بتوع علم الاجتماع أو الظواهر الخارقة حتى يدرسوا ويعرفوا ويقولوا لنا ايه إللي ممكن يدفع مواطن مصري أنه يقتل ويمثل بجثة مواطن مصري تاني والاثنين أصلا قرفانين وجعانين وحياتهم بؤس ومش بعيد تكون مطالبهم واحدة.. لكن محدش فاهم أو عارف هما أزاي بيعملوا كدة.. وأزاى أصبحت السادية صفة غالبة في شريحة كبيرة من المصريين.. وحتي لو أتوقفت المذابح.. وتم تحقيق مطالب المتظاهرين أزاي هنسكت علي الكراهية الدفينة إللي موجودة في النفوس دي ومش معروف سببها.. وأنها قنبلة موقوتة متعددة الانفجارات يعني ممكن تنفجر في أي وقت وأكثر من مرة لو متعالجتش.. ده لو في أمل في علاجها..

لكل إللي بيقولوا مصر أولا.. هما برضو إللي بيقولوا الانتخابات أولا.. انتخابات ايه ونيلة ايه.. ايه اللى هتضمنه الانتخابات.. وايه هي الحماية إللي هيوفرها مجلس أعضائه مبكوش علي دم اللى ماتوا عشان كانوا مشغولين بحملاتهم وأزاى يستقطبوا الناس..

لكل إللي بقولوا مصر أولا.. ما هو تعريفكوا لمصر لامؤخذاه لأني مش عارفه.. مصر إللي هى المصانع ولا المباني ولا النيل ولا البورصة ولا عجلة الإنتاج ولا الصحاري ولا الكباري.. ولا هي الشعارات الحلوة الرنانة من عينة مصر هي امي أو مصر هي الحياة أو مشربتش من نيلها أو مصر ام الدنيا أو تعيشي يا مصر ونموت احنا أو أنا قلت لهم الجنة بلادي.. حد يفهمني مصر هي ايه من غير ناسها وشعبها.. مصر هي أيه لما مصري يقتل مصري عشان بيقول عيش حرية عدالة اجتماعية.. ده المثل يا جدعان بيقول جنة من غير ناس ما تنداس.. ولما الناس يتحولوا لوحوش يقتلوا الضعفاء فيها في الأخر مش هيتبقي غير الوحشين.. وأرض كلها وحوش مظنش أن دي تبقي جنة حتى لو أسمها مصر..




ك. ك
21 – 11 – 2011

هناك 6 تعليقات:

  1. 1-الحالة النفسية بتاعة العساكر المصريين دي مش هنا بس لكن في كل البلاد العربية بيتعاملوا بنفس الإسلوب و احنا شايفين اللي حصل في الثورات العربية من أول السنة
    2- مصر هي كائن حي رائع ، عمرها 7 ألاف سنة - مرت عليها من البشر ألوان و أشكال - إحتوت الدنيا كلها - و عمرها ما رفضت حد - جمعت ما بين ثقافات الدنيا - و مهما جلها غريب - بييجي و يتعلم و يتأثر بيها و تتأثر بيه - و تبقى بنيلها و بحارها و صحاريها و أرضها الخصبة - و مهمى عدت سنين تفضل جوهرة في عيون عشاق العالم - أنا عن نفسي بحبها بكل شيء فيها حتى الزبالة و المجاري و طين الشتى -
    إن كنا حسين أسية عالينا ده لأننا كشعب إسينا عليا الأول و سيبناها في إيدين عصابة جارت عليها - لكن ه بتسامح . . و لسه فيه ناس أصيله فيهم روح مصر - روح 7000 سنة دي حاجه في الجينات - مش الناس وحشين - الفقر و القهر و الجهل بيتحكموا في الناس ، لكن الأمل دايما. . في الشباب الطاهر المصري المليان بروح الوطن ، روح التحرير - لسه فيه ناس طيبين رغم الفقر و القهر و الذل و الجهل - ده مرض و أي مرض له علاج - في التاريخ كان بيمر بده كتير لكن لما بيثور و يتحرر من فيرس المرض اللعين - مصر بترجع لولادها و ولغادها يرجعولها - مصر هي روح و حياة

    ردحذف
  2. كلنا بنحب مصر يا مينا لا اختلاف على الحب ده.. لكن هي مش تابوه عشان نعيش نسجد له وهو بيدينا بالجذمة..
    مع كامل احترامي لرأيك لكن أحب أقولك شكرا على مجموعة الشعارات الرنانة اللى مجتش على بالي امبارح من عينة جوهرها وروح عشاقها وروح الوطن والكلام الفلالي ده

    ردحذف
  3. تمااااااااااام ياكارول كلام مظبوووووط ربنا يعدى الازمة دى على خير لحسن الواحد بجد بجد هيتجنن موووووووووت من اللى بيحصل فى مصر وبقى يشعر بالخوف وعدم الاماااان

    ردحذف
  4. ياااااااااااارب يا ايمي.. ومتشكرة جداااااااا على زيارتك للمدونة

    ردحذف
  5. "انت غلط اذن انت تستحق القتل" جملة عبقرية كتبها بهاء طاهر في احدي روايته بجد بتمثل فعلا اللي بيحصل دلوقتي.... التعصب عمر ما كان حدوده شوية معتقدات دينية او حتي فريق كورة بشجعه انما هو اي فكرة الانسان بيعتقد في صحتها ويري ان من لا يومن بها لازم تصيبه كل اللعنات اللي ممكن تصيب اي انسان علي وجة الارض .. الموضوع اكبر بكتير من الالات المبرمجة علي القتل اللي بتدبح في احلي شباب مصر ...جربي كدة ياكارول تسالي اي عينة عشوائية من المصريين عن اللي بيحصل في الثوار (دة لو هما شايفين ان هما ثوار اساسا)هتلاقي اغلب الاراء: "هما اية اللي منزلهم من بيوتهم اساسا يستهلوا اللي يحصلهم" "انا مش عارف بس الناس دية عايزة اية من البلد مفروض يتقبض عليهم ويتعدموا في ميدان عام عشان يبقوا عبرة لغيرهم" "وهي البنت الشر... اللي نازله من بيتها دي لو ليها اخ يشكمها مكنتش نزلت اساسا"..... من الاخر انتا غلط انتا تستحق القتل وفي راي ان دة في حد ذاته مشاركة في القتل يعني سحل الثوار بيتم بمباركة فئة كبيرة من الشعب المصري والغريب في كدة انك هتلاقيهم كلهم بيحبوا البلد دي زي اي واحد فينا... حاجتين خربوا البلد دي الفساد وثقافة التعصب والتانية دي بالذات محتاجة اجيال تروح بغبائها واجيال تانية تيجي تكون عاشقة للحياة

    ردحذف
  6. اولا يا جون اختيارك لبهاء طاهر اختيار موفق جداااااا لأنه الكاتب المفضل ليا..
    ثانيا كلامك صح وموزون.. لانى دايما بقول الفساد مكنش فى الروس الكبيرة اللى هى روس النظام بس.. الفساد خلاص بقي متغلغل في النخاع الشوكي للمجتمع واسقاط نظام فاسد مش معناه ان البلد هتبقي فلة شمعة منورة..
    ثالثا شكرا لزيارتك المدونة واتمني تبقي قارئ دائم

    ردحذف