لما جيت ألقط الصورة دي مكنتش أعرف الست دي أسمها ايه ولا ديانتها ايه.. لأني شفت سيدة مسنة مريضة خارجة من اللجنة الانتخابية تستند على عكاز.. وبعد كدة أتعكزت علي اتنين ستات واقفين تحت الرصيف عشان تنزل.. واحدة محجبة والتانية مش محجبة ولابسه صليب..مقدرتش للوهلة الأولي أحدد هل هي تبع واحدة فيهم ولا مجرد ست عجوزة بتتسند عليهم عشان تنزل.. في اللقطة دي وصوباعي علي زرار الالتقاط قلت في نفسي هي دي مصر حالياً.. ست عجوزة مريضة لكن كلها أمل وتفاؤل.. ورغم المرض وكبر السن نازلة تعمل حاجة كويسة وصح.. قد تكون نتيجة الحاجة دي هى مش هتحس بيها أو تعيشها لكن عندها أمل أن أحفادها وأولادها يحسوا بيها..
مصر للوهلة الأولي تبان لناس كتير قد أكون أنا شخصياً منهم بلد مسنة.. ولت أيام الخير فيها.. ومعدش فى العمر ليها أد إللي فات.. لكن لما ألاقي مصر بتتسند علي عكازي وبتحاول تعملي حاجة كويسة رغم كل إللي فيها.. يبقي أكيد مش هبخل عليها بذراعي تتسند عليه..
مصر في كلمتين.. عجوز على عكازين.. هكذا نطقت الصورة..
ك. ك
28 – 11 – 2011
بس تفتكري الانتخابات دي ممكن ترجع مصر شابة عفية مرة تانية...؟!!!
ردحذفاتمنى و احلم بذلك
تحياتي
بصراحة يا احمد انا مش متأكدة ومش عارفة اصلا الانتخابات دي هتبقي نزيهه ولا لأ.. بس انا كمان بحلم بده..
ردحذفشكرا لأني حاسه أنك قارئ مستمر لمدونتي
المهم ان الصورة مقالتش دي مسلمة او مسيحية متدينة او غير متدينة الصورة وضحت معاني انسانية اكتر منها سياسية - فيها اية لو مصر ترجع انسانية لا مدنية ولا اسلامية ولا علمانية - لان في الاخر هي مصر وبس
ردحذفبالظبط يا لودي.. المعاني الانسانية هى الابقي علي فكرة.. وهي الأقدم أي قبل ظهور الاديان
ردحذف