فتاة هزت جيش مصر

في الوقت الذي تعرضت فيه ديلما فانا روسيف الناشطة البرازيلية للتعذيب علي أيدي رجال الجيش أثناء حبسها 3 أعوام في أحد السجون العسكرية في البرازيل منذ 42 عاماً لمعارضتها النظام الحاكم المستبد وقتها، وبكي العسكر أثناء الإدلاء بشهادتها عما تعرضت له، يبقي موقف العسكر في مصر مخزي ومخجل وصادم تجاه الفتاة "المصرية" التي تم سحلها وتعريتها علي أيدي رجال جيش مصر البواسل في أحداث مجلس الوزراء أمام مرآي ومسمع العالم كله.

وفي الوقت الذي تخاذلت فيه فئات من الشعب المصري عن نجدة "المصرية"، ونالتها آراء هذه الفئات بالتشهير وقاموا بتعريتها للمرة الثانية ولكن بعد أن جردوها من كرامتها الإنسانية ورأوا أن ما حدث لها هو شئ تستحقه، اختار شعب البرازيل ديلما فانا روسيف رئيسة لدولتهم في الانتخابات الرئاسية 2010 لتصبح أول امرأة برازيلية في المنصب.

غطي العسكر أوجههم من عار ما حدث لديلما روسيف في هذه الصورة النادرة أثناء الاستجواب في مقر المحكمة العسكرية في ريو دي جانيرو، بينما يتبجح في مصر العسكر علناً أمام عدسات التليفزيون بما حدث ويحدث في شارع مجلس الوزراء، من ضرب وسحل النساء، ويعترفون بحقيقة الواقعة وأنها ليست "فوتو شوب" ويقولون "لكن يجب معرفة ظروفها، ويجب أن يتم النظر إلى الأمور والأحداث فى سياقها كاملة".

أي سياق هذا يتحدث عنه القائل..!!!
لكن وبعد كشوف العذرية.. كيف ننتظر ممن لا يستحي ولا يضع اعتبارا للشرف.. أن ينظر لفاجعة سحل وتعرية فتاة في الشارع بعين عادلة.. أو أن يدلي بتصريح أقل سذاجة مما أدلي به..

إلي العسكري.. "أن لم تستحي.. فأفعل ما شئت"..
إلي الشعب الصامت والمبرر لهذه الجريمة.. "إنما الأمم الأخلاق ما بقيت.. فأن هم ذهبت أخلاقهم.. ذهبوا.."
إلي النخوة والرجولة.. "باي باي كمبورة"..



ديلما روسيف رئيسة البرازيل في صورة نادرة أثناء الاستجواب في مقر المحكمة العسكرية في ريو دي جانيرو.



الفتاة المصرية التي تم سحلها وتعريتها في أحداث شارع مجلس الوزراء.


ك. ك
20 – 12 – 2011

براءة صهيون من جرائم مصريون.. ج2

أول مرة مبقاش عارفة اعبر عن إللي جوايا.. وأحس بالعجز عن الكتابة.. رغم أن الحاجة الوحيدة إللي بعرف أخرج فيها غضبي وآلمي هي الكلمات المكتوبة.. ورغم إحساسي أني لازم أدون وأسجل الجريمة إللي بتحصل في شارع مجلس الوزراء للمعتصمين عامة.. وللبنات إللي زي بخاصة.. إلا أني مش عارفة أكتب حاجة.. لكن عارفة حاجة واحدة أن حتى أبشع ناس بنتكلم عن تعاملهم مع الآخرين وهم الصهاينة في تعاملهم مع الفلسطينيين يقدروا يقولوا للجيش المصري يا معلم.. ويمكن يطلبوا يبعتوا كتايب ياخدوا كورسات هنا في مصر علي أيدي المجلس العسكري في كيفية التعامل بوحشية وغير آدمية وعدم أخلاقية مع مواطنيين عزل.. لكن طبعا الصهاينة مش هيتعلموا الحاجات دي عشان يتعاملوا بيها مع أبناء شعبهم.. لكن مع ناس من وجه نظرهم أعدائهم.. لأنها أساليب لا يقبلها الجيش الإسرائيلي علي أبناء شعبه.. فهو يهتم برفات قتلاه.. فهل يقبل بانتهاك آدميته وهو علي قيد الحياة..


معنديش غير لينك تدوينه كتبتها يوم 21 – 11 – 2011، عن جريمة سحل مواطن وقتله وإلقاء جثته علي كوم زبالة بالإضافة إلي باقي الجثث إللي تم تكويمها فوق بعض بعنوان "براءة صهيون من جرائم مصريون".. http://kefeekedaa.blogspot.com/2011/11/blog-post_21.htmlيتناسب تماما مع الأحداث الحالية.. السيناريو ذاته.. والبشاعة ذاتها.. الأيد الآثمة الملطخة بالدماء ذاتها.. المجرم ذاته.. والضحية هي ذاتها.. لكن باختلاف الصور.. فانا حطيت لينك التدوينة القديمة دي.. وفيديو المهزلة الإنسانية..


ك. ك
18 – 12 – 2011

من مسيحية لرجال الإعلام المصري: بجهلكم نجح السلفيون

كيف حقق السلفيين نتائج غير متوقعة في الانتخابات ساعدها التزوير الفج والتواطؤ البين.. لا أجد إجابة محددة ولكن أظن أن الإعلام هو الذي لعب دور قوي ومؤثر في إعطاء شريحة كبيرة من المصريون أصواتهم للسلفيين.. حيث ركز الإعلام خلال الفترة الماضية علي عدة نقاط فقط في التحاور معهم..

وعلي سبيل المثال وليس الحصر.. الحرب الضارية المقرر شنها علي لبس المايوه البكيني.. والذي يسبب حالة من الهوس الغير طبيعي لدي هؤلاء المشايخ.. وتأتي تصريحاتهم بالرغم من انه لا ترتديه سوي نساء من طبقة معينة من المجتمع تستطعن الإقامة بشواطئ خاصة غير متاحة لعامة الشعب.. فلم يحدث أن رأي المصريون فتيات البكيني يحصلن علي الطبقة البرونزية في مصيف بلطيم.. أو يربطن الكاش مايوه أثناء السير علي الرمال الساخنة بمصيف رأس البر.. أو حتى يدفن أجسادهن "العارية" كما يقول عنهم المشايخ في رمال جمصة.. وأخيراً لا يتسابقن في عرض مفاتنهن في الشواطئ العامة بالإسكندرية..

شرب وبيع الخمور في مصر.. خرج المشايخ يشهرون سيوفهم في أوجه الفاسدين الذين يسيروا ليلاً أو حتى نهاراً إلي بيوتهم يترنحون وينشدون "هات الإزازاة وأقعد لاعبني".. وقاموا بتحويله إلي مشهد يومي نراه في الطرق العامة.. وأقنعوا البسطاء أن مصر فى القريب سوف تختنق في عنق زجاجة خمرة..

الأحضان والقبلات في الطرق العامة.. لا أعرف انشغالهم بها هل لرفضهم أن تكون في الطرق العامة أم لا.. ولكن لهم في ذلك حق ولا ألومهم عليه.. فأنهم يحاولون منع انتشار الحقد والغيظ.. فمن لا يحصل علي قسط من هذه القبلات والأحضان بالتالي سوف ينفق نهاره وليله في الدعاء علي الآخرين.. وتتأخر عجلة الإنتاج.. الخ الخ الخ


شريحة كبيرة من المواطنون المصريون يرفضون هذه السلوكيات.. ليس من منطلق الأخلاق والأعراف وصورة المجتمع وغيرها.. ولكننا في المجتمع المصري للأسف نري أن أي رفاهية يحصل عليها شخص أخر ولا تتوافر لي فأنها فسق وفجور.. ويرفضها بعض البسطاء وينادي بمحاربتها من منطق "الحقد الطبقي".. بمعني "يا نعيش عيشة فل.. يا نموت أحنا الكل".. ولكننا لسنا بصدد علاج هذه الأزمة النفسية الاجتماعية التي أصبحت متأصلة فينا..

ولكننا بصدد سؤال واحد لماذا ركز الإعلام المصري طوال الفترة الماضية علي هذه النقاط فقط في التحاور مع السلفيون بخاصة والإسلاميون بصفة عامة.. هل من منطلق أن المصريات جميعهن يرتدين البكيني.. أم لأن زجاجة الخمر لا تفارق بيت مصري.. أو قد يجوز أن القبلات والأحضان في الطرق العامة هو أقصي طموح مصري حالياً.. أم ركز عليها الإعلام لأن هذه النقاط هي التي تشغل بال هؤلاء الإعلاميين.. لأن هذه الرفاهيات لا يحصل عليها سوي أصحاب هذه الطبقة..

هل يهم المواطن البسيط ماركة البكيني المقرر منعه.. أم يهمه أنبوبة الغاز التي لم يعد يقو علي دفع ثمنها.. هل يبالي المريض المصري الذي يحصل علي علاجه من التأمين الصحي باختفاء زجاجة البيرة من محلات الخمور وبالتالي التأثير علي "كيف الباشوات".. وغيرها وغيرها من الأمور التي لم تكن علي ساحة اهتمامات المواطن المصري.. وللأسف وبكل جهل وضعها الإعلام المصري في طريقه.. وجعله حاليا يضع كل شئ في مجال مقارنة مع هذه الرفاهيات التي لا يعرف عنها شئ.. حتى جاء المنقذ متمثلاً في نواب السلفيون الذين قرروا عوضاً عن أن يصلحوا حياته أن يحذفوا هذه الرفاهيات من أمام عينيه حتى لا يتذكر حجم مأساته التي يحيياها..

اختار السلفيون الطريق السهل وهو منع الخمور ومنع البكيني ومنع مسك الأيادي.. واختار الإعلام المانشتات الساخنة والتصريحات النارية التي يعد أغلبها وأن لم تكن كلها مضحكة وسخيفة لكنها تُرضي طموحات المواطن "الغلبان".. وتبادل الشباب وغيرهم علي الفيس بوك وتويتر هذه التصريحات والمقاطع الكوميدية.. وانهالت التعليقات الساخرة المصدومة في هذه الأفكار البالية..

لم يبادر أي إعلامي بسؤالهم عن الاقتصاد أو البطالة أو أنبوبة الغاز أو الدواء أو السكن.. وما هي الخطط الموضوعة من قبلهم لاحتواء هذه الأزمات.. ظناً منهم أن أسئلة البكيني سوف تكشفهم للشعب المصري وبالتالي سوف يلفظون هؤلاء المتشددون المتعصبون.. ولكن جاءت نتيجة الانتخابات صادمة مفجعة محزنة.. وتساءل هؤلاء كيف أختار الشعب المصري المعتدل نواب يحرمون البكيني والقبلات والخمور..

لم يهتم أي أعلامي بأن يضع هؤلاء النواب أمام الشعب المصري في اختبار ثقة يجبرهم علي التحدث في الأمور الهامة كالاقتصاد والصحة والتعليم لكشف حقيقتهم الجاهلة أمام الشعب الذي ينتظر ما هو أكثر من تحريم للبكيني.. ولكن هذا المواطن لم يجد أمامه سوي رجال يهتمون "بصغر نفسه".. ويلعبون علي وتر فقره والإحساس بمعاناته.. وعوض حل مشاكله.. أخبره بأن الحرمان سوف يأتي علي الجميع.. حتى لا يشرب أحد الخمور بينما لا تجد العلاج.. أو ترتدي النساء البكيني وأنت لا تجد كسوة الشتاء..

ولكن بأي تفكير ظن هؤلاء المحنكين إعلامياً أن ما قاموا به من كشف العورات الفكرية والنفسية لهؤلاء سوف يجعل الشعب المصري يرفض أفكارهم المتطرفة.. الشعب المصري الذي يعيش أكثر من نصفه تحت خط الفقر.. ولا يعرف معظمه ما هو البكيني.. وأخر معلوماته عن الخمر هي "خمارة الخواجة ياني.. إللي كل الموجودين هناك عربجية وراقصات بشمعدانات.. وقمار"..


أيها الإعلاميون الموقرون راجعوا المشهد مرة أخري لعلكوا تتعلمون.. وليس الشعب المصري كله تويتريون وفيس بوكيون..

ك. ك
4 – 12 – 2011

مصر في كلمتين.. عجوز على عكازين

لما جيت ألقط الصورة دي مكنتش أعرف الست دي أسمها ايه ولا ديانتها ايه.. لأني شفت سيدة مسنة مريضة خارجة من اللجنة الانتخابية تستند على عكاز.. وبعد كدة أتعكزت علي اتنين ستات واقفين تحت الرصيف عشان تنزل.. واحدة محجبة والتانية مش محجبة ولابسه صليب..

مقدرتش للوهلة الأولي أحدد هل هي تبع واحدة فيهم ولا مجرد ست عجوزة بتتسند عليهم عشان تنزل.. في اللقطة دي وصوباعي علي زرار الالتقاط قلت في نفسي هي دي مصر حالياً.. ست عجوزة مريضة لكن كلها أمل وتفاؤل.. ورغم المرض وكبر السن نازلة تعمل حاجة كويسة وصح.. قد تكون نتيجة الحاجة دي هى مش هتحس بيها أو تعيشها لكن عندها أمل أن أحفادها وأولادها يحسوا بيها..

مصر للوهلة الأولي تبان لناس كتير قد أكون أنا شخصياً منهم بلد مسنة.. ولت أيام الخير فيها.. ومعدش فى العمر ليها أد إللي فات.. لكن لما ألاقي مصر بتتسند علي عكازي وبتحاول تعملي حاجة كويسة رغم كل إللي فيها.. يبقي أكيد مش هبخل عليها بذراعي تتسند عليه..

مصر في كلمتين.. عجوز على عكازين.. هكذا نطقت الصورة..

ك. ك
28 – 11 – 2011

براءة صهيون من جرائم مصريون

عارفة أن الدنيا مولعة.. والناس مش مستحملة حد يتفلسف أو يتفزلك عليهم.. لكن في حاجة محيراني جدا جدا جدا.. ومستغربة أن محدش واخد باله منها.. لكن طبعا بما أني متميزة وبحب أطلع القطط الفطاسنة في أي حاجة.. وأوقات كتير المش فطسانة.. وده لأني بحاول دايماً أشوف السبب النفسي ورا كل حاجة بتحصل حواليا.. وعادة مهببة هي محاولاتي الدائمة في تحليل الناس نفسيا والتوغل في أعماقهم.. فما بالكوا بظاهرة مفجعة زي إللي بتحصل في ميدان التحرير من يوم الجمعة 18 نوفمبر لغاية دلوقتي..

مذابح دموية مخطط لها.. الشرطة والشرطة العسكرية وقوات الجيش.. إللي هما كلهم جنسيتهم مصريين حتى الجد الخمشتاشر.. بيضربوا بالرصاص المطاطي والقنابل المسيلة للدموع والخرطوش ومؤخرا الرصاص الحي مصريين تانيين بس عزل ومصريتهم برضو حتى الجد الخمشتاشر.. والكارثة مش بس في ضربهم.. لأ.. الكارثة هو في الحالة النفسية البادية عليهم.. وهي تتراوح ما بين كراهية مفرطة وغل دفين في معاميق نفسويتهم.. بالإضافة إلي استمتاع غير عادي وتلذذ غريب وتفنن في تعذيب المتظاهرين وقتلهم والتمثيل بجثثهم.. وضرب الموتي بالجزم والعصي بكل وحشية.. وأخيراً إلقاء الجثث علي أكوم الزبالة.. رغم أننا الشعب إللي كاتب علي عربيات نقل الموتي "سيارات تكريم الإنسان".. لأن عندنا إكرام الميت دفنه مش رميه لكلاب السكك..

من أين جاب المصريون دول أي كان الهيئة المجندون فيها سواء شرطة أو شرطة عسكرية أو الجيش كل الكراهية والغل والقسوة في تعاملهم مع أخوانهم وشركائهم في الوطن حاملي الجنسية ذاتها "مصري".. أزاى تحول هذا المجند بقدرة قادر لهذا الكائن السادى.. مهما كنت الأوامر إللي هو واخدها أزاي مفكرش للحظة أن ممكن اخوه أو جاره أو حد قريبه تلعب الصدفة دورها ويكون متواجد في التحرير وبأيده هو يقتله.. أزاى هيعيش مع الذنب ده طول حياته وأزاى هيسامح نفسه.. ده لو أتعاملنا بمنطق الأقربون أولي بالمعروف.. يعني انه مش هيفكر في أي مصري تاني إلا لو بيربطه بيه صلة دم.. لكن دي حتى كمان مجتش في بالهم..


منظر غريب في هذا الفيديو وهو طاقة الشر والكراهية إللي بيتصرف بيها العساكر "المصريين" مع المتظاهرين "المصريين".. مش هسأل ايه هى الأوامر إللي هو اخدها.. وان فئة الأمن المركزي دول بيختاروهم علي أساس الغباء.. وهذا الكلام المتداول عنهم.. لكن هسأل أين آدميتهم.. أين نخوتهم.. أين انتمائهم لأخوة وشريكه في الوطن وشعوره بالهم المشترك.. والمؤلم أكثر هو المنظر البشع لجنود الأمن المركزي وهما بيضربوا بنت في التحرير بصورة مقززة ومهينة ومخيفة أين الرجولة.. يعني مبقاش في آدمية ولا رجولة ولا أي حاجة تقول أن دول بشر..

كنا بنقول الصهاينة المتوحشين والمذابح القذرة في حق الفلسطينيين.. مع كامل احترامي للقضية الفلسطينية وشهدائها.. لكن هرجع وأقول ده صراع قديم علي أرض ووطن وكلام كبير.. من الأخر لا يكن أي منهما مشاعر طيبة للأخر.. وأنا بتكلم عن الصهاينة وليس اليهود بشكل عام.. عشان كدة الناس في مصر والوطن العربي لما بيشوفوا جريمة بشعة بيقولوا علي المجرم شوفوا الصهيوني عمل ايه.. انهاردة حد يقدر يقول علي مرتكبي مذابح التحرير صهاينة.. مظنش.. لأن إللي ضرب النار والقنابل المسيلة للدموع منتهية الصلاحية وغيرها التي قد تعد محرمة دوليا هو مصري أبن مصري.. وهنا الجريمة أكثر بشاعة ووحشية.. بالإضافة إلي أنها غير مبررة بمعني أن المصري الأعزل ده مكنش بيهدد حامل البندقية.. والمسلح هو إللي هجم علي الأعزل ودفعه للدفاع عن نفسه بالطوب.. بالضبط مثل الانتفاضة الفلسطينية وأطفال الحجارة.. ففي رأي أن كل جندي مصري أطلق خرطوشة علي مصري هو أكثر حقارة ودناءة من العساكر الصهاينة.. وصهيون بريئة من بشاعة هذه الجريمة المصرية الخالصة..

هل عايزين يقنعونا أن جنود الأمن المركزي ومجندين الشرطة العسكرية عايشين ميت فل وأربعتاشر وبيروحوا مارينا في الصيف وأسوان في الشتا.. عشان كدة حاسين أن تمرد الشعب ومظاهراته دي وحشة كخة وعلي أساسه بيعاملوهم بالوحشية دي.. ده اللجنة الدولية للصليب الأحمر من أهم مبادئها هو معالجة الجريح حتى وأن كان من صفوف العدو رغم أن أصلا معندهمش تعريف عدو.. ومين طيب ومين شرير.. لكن أقصد أنهم بيعالجوا الجميع وبيبذلوا حياتهم عشان أي حد حتي اللى الناس ممكن تكون شيفاهم مجرمين.. لكن هي بتتعامل مع الجريح كإنسان محتاج مساعدة.. فأزاي أي بني آدم يفسر ضرب الأمن المركزي للمستشفي الميداني إللي كله جرحه وبيعالج مصريين بقنابل مسيلة للدموع.. ده لو الجيش المصري بيحارب محرم عليه دوليا وطبقا للقوانين والمعاهدات ضرب المؤسسات الخدمية وخاصة المستشفيات.. يعني لو الجندي المصري بيحارب إسرائيليين مش هيضرب نار علي مستشفياتهم مهما كان متغاظ منهم وبيكرههم وفي حالة حرب.. فأزاى هانت عليه حرمه جرح ودم أخوه المصري إللي مش محتاج معاهدات دولية تقوله ممنوع تضرب مستشفي.. ولا لأنها حاجة محرمة إنسانيا وأخلاقيا ودينيا.. ده لأنها حرمة دم واخوه..

هل ممكن حد من بتوع علم الاجتماع أو الظواهر الخارقة حتى يدرسوا ويعرفوا ويقولوا لنا ايه إللي ممكن يدفع مواطن مصري أنه يقتل ويمثل بجثة مواطن مصري تاني والاثنين أصلا قرفانين وجعانين وحياتهم بؤس ومش بعيد تكون مطالبهم واحدة.. لكن محدش فاهم أو عارف هما أزاي بيعملوا كدة.. وأزاى أصبحت السادية صفة غالبة في شريحة كبيرة من المصريين.. وحتي لو أتوقفت المذابح.. وتم تحقيق مطالب المتظاهرين أزاي هنسكت علي الكراهية الدفينة إللي موجودة في النفوس دي ومش معروف سببها.. وأنها قنبلة موقوتة متعددة الانفجارات يعني ممكن تنفجر في أي وقت وأكثر من مرة لو متعالجتش.. ده لو في أمل في علاجها..

لكل إللي بيقولوا مصر أولا.. هما برضو إللي بيقولوا الانتخابات أولا.. انتخابات ايه ونيلة ايه.. ايه اللى هتضمنه الانتخابات.. وايه هي الحماية إللي هيوفرها مجلس أعضائه مبكوش علي دم اللى ماتوا عشان كانوا مشغولين بحملاتهم وأزاى يستقطبوا الناس..

لكل إللي بقولوا مصر أولا.. ما هو تعريفكوا لمصر لامؤخذاه لأني مش عارفه.. مصر إللي هى المصانع ولا المباني ولا النيل ولا البورصة ولا عجلة الإنتاج ولا الصحاري ولا الكباري.. ولا هي الشعارات الحلوة الرنانة من عينة مصر هي امي أو مصر هي الحياة أو مشربتش من نيلها أو مصر ام الدنيا أو تعيشي يا مصر ونموت احنا أو أنا قلت لهم الجنة بلادي.. حد يفهمني مصر هي ايه من غير ناسها وشعبها.. مصر هي أيه لما مصري يقتل مصري عشان بيقول عيش حرية عدالة اجتماعية.. ده المثل يا جدعان بيقول جنة من غير ناس ما تنداس.. ولما الناس يتحولوا لوحوش يقتلوا الضعفاء فيها في الأخر مش هيتبقي غير الوحشين.. وأرض كلها وحوش مظنش أن دي تبقي جنة حتى لو أسمها مصر..




ك. ك
21 – 11 – 2011

طُز فيكي بقي يا مصر

لم يمر علي ثورة 25 يناير أيام وخاصة بعد رحيل المخلوع.. إلا ولقينا الأصوات بتنادي بحشد الشباب المصري وقوات الجيش عشان يروحوا يحرروا غزة من الاحتلال الإسرائيلي.. والأدهى والأذكى أن في مسيرات نزلت عشان تنادي بحرية غزة.. وبتندد بتقاعس المصريين في الدفاع عن القضية والدخول في حرب مع إسرائيل.. وأن مصر لسه وحشة كخة زي ما كانت أيام المخلوع عشان مفتحتش النار من سيناء _أكنها بترش مية_ علي إسرائيل وأبادتها من علي وجه الكرة الأرضية..

كل ده والثورة المصرية لسه بتقول يا هادي يارب.. وطبعا مكنش لسه حصلت البلاوي بتاعت حرق الكنايس والفتن الطائفية إللي ولعت في البلد ولسه بإذن المولي عز وجل هتولع تاني طول ما سياسة البوسة تحل كل حاجة شغالة.. المهم أن كمان المطالب بتحرير غزة كانت برضو قبل ما مصر تضرب تفليسه.. وأزمة البنزين تظهر وتلعلع.. مهو أحنا البلد الوحيدة إللي بتولع من غير وقود.. وحرب المحافظات إللي شبه حرب العصابات والمكسيك وشيكاغو من حيث وجود رهاين وترسانات عسكرية.. وأخيراً وليس أخرا ميناء دمياط يتقفل.. والبضايع تتحجز جوة.. يعني مصر وقتها كانت لسه فيها النفس..

لكن بقي إللي يشل وينقط هي المطالب إللي بعض الفئات نازلة انهاردة الجمعة 18 نوفمبر عشان تطالب بيها.. ومصر خلاص تقريباً كدة في مرحلة النزاع الأخير في أوضة الإنعاش.. لأن الورثة عمالين يقسموها ويقطعوا فيها اكنها خلاص في ثلاجة المشرحة.. ومحدش يقولي متشائمة.. المهم خليني عزيزى القارئ أعرض عليك جزء من منشور كان بيتوزع أمبارح الخميس في ميدان التحرير والناس نازلة بالعفش والخيام عشان تنصبها فى الكرنفال..

"يعلن (اتحاد قوة ثورة مصر) و (اتحاد المستقلين من اجل مصر) تضامنهم الكامل مع الجبهة الشعبية لاستعادة أم الرشراش المصرية المحتلة (ايلات)...


وسوف ينعقد مؤتمر في سيد ميادين العالم (التحرير) الساعة السادسة مساء يوم الخميس الموافق 17 / 11 / 2011 تحت رعاية إتحاد المستقلين من أجل مصر واتحاد قوة ثورة مصر وأعضاء جبهة استعادة (أم الرشراش) وهذا المؤتمر الثاني بع انعقاد المؤتمر الأول الذي انعقد في 9 / 9 / 1999 بفندق شيبرد"

الله أكبر وتبا للخونة والعملاء

علي فكرة مش انا إللي كاتبة "تباً" دي.. هذه نقلاً عن البيان..

نرجع للمنشور تاني.. هي مش لامؤاخذه أم الرشراش دي إللي بين قوسين ايلات _بتاعت فيلم الضفادع البشرية وصوباع المتفجرات إللي نبيل الحلفاوي وسعه بالمبرد_ مش برضو تحت الإحتلال الإسرائيلي.. يعني جيش وجنود وسلاح وبلاوي زرقاء.. ومعني تحريرها اننا نشتبك في حرب.. لأن أكيد مش هنروح لإسرائيل نقولها ممكن يا سوسو تدينا إيلات.. فهي تقولنا خدي يا مي مي "دلع مصر يعني" إيلات وفوقيها بوسة.. طيب مش الأول نحرر مصر من البلطجية إللي أحتلوها ومحدش عارف يصد قدامهم.. او محدش عايز يصدهم.. مهو مبقاش في حاجة مفهومة في البلد دي..

حد هيقولي البلطجية دول صناعة جهاز الشرطة.. وحاليا بيلعبوا ناشئين تحت السن في فريق القوات المسلحة.. طيب يعني كدة هنسكت ونسيبهم عشان بيلعبوا بفانلة العسكري.. طيب ما بالأولي نحشد المصريين عشان يحاربوا الغزاة في الداخل إللي بيشيعوا فساد وخوف وجريمة في 29 محافظة بدل ما نفكر في ميناء أو بقعة مع كامل احترامي لمصريتها لكن مش وقتها خالص.. في مثل واحد في بالي بيوصف حالنا دلوقتي لكن مش هينفع أكتبه..

للأسف وبكل حزن مع كل مليونية جديدة ومطالب من عينه أم الرشراش دي بحس أني بسمع هتاف واحد "طُز فيكي بقي يا مصر".. مطالب بتوريط مصر في حرب في الوقت الحالي وأحنا مش قادرين نحارب البلطجة وانهيار البورصة والفتنة الطائفية والجوع واختفاء البنزين وضياع السياحة وفقدان عشرات الآلاف لوظائفهم وغيرها وغيرها من الحروب الأكثر خطورة وأهمية.. وتحتاج لحشد المصريين لمحاربتها.. مش بتدل غير علي حاجة واحدة وهي أن التخلف وعدم القدرة علي تقييم الأمور وتحديد الأولويات وغيرها من الآفات هي من تحتل فكر شرائح كبيرة من الشعب المصري.. هل أصبحت أم الرشراش الآن أهم من رغيف العيش.. متى يتحرر الشعب المصري حقاً..!!!

ك. ك
18 – 11 - 2011

المعلم .. المتهم الذى لم تثبت إدانته

سألنى أصدقاء كثيرون لماذا حذفت التدوينة التى هاجمت فيها إبراهيم المعلم، بعد 3 شهور من كتاباها، أصدقائى كما أعرف يثقون في كثيراً، بعضهم سألنى: يعنى اللى انتى كاتباه ده نصدقه، ولا منصدقوش، والحقيقة إن عاوزه أقولكم صدقوه ومتصدقهوش، أو بمعنى أصح صدقوا بعضه ومتصدقوش بعضه.

وأنا مش من النوع اللى بقاوح أو أكابر، ولما تجيلى معلومة موثقة تبدد شكوك كانت عندى يبقى لازم زى ما نشرت الشكوك على أنها معلومات وحقايق، أنشر اللى جالى بعد كده.

كتبتلكم عن المهازل اللى بتحصل فى بوابة الشروق، من لولا هانم ورجالتها، فصل تعسفى ومعاملة مهينة، وإٍساءة لاستخدام الصلاحيات، والتنكيل بصحفيين شطار جداً وتشغيلهم داتا انترى ووكالات، وحرمان الناس من الفرص فى التعيين أو العقود وكأنهم عمال سخرة.

والحقيقة كل ده حاصل وبيحصل معنديش شك فى ده وهو ده اللى أنا بقولكم صدقوه، للأسف دار الشروق اللى اسمها زى الطبل ومن بره أى حد شايفها مؤسسة كبيرة، وكل أصدقائى الكتاب ومنهم صديقى العزيز مكاوى سعيد بيأكدولى إنها أكتر مؤسسة بتراعى حقوقهم حتى لو مطلبوهاش، لكن فى بوابة الشروق الوضع مختلف تماماً يا جماعة، لا حقوق ولا معاملة ولا انسانية.

كل ده زى ما قولتلكم كان بيحصل باسم ابراهيم المعلم، فلان اتفصل لأن المعلم قال يتفصل، وفلان اتنكل بيه لأن المعلم قال كده، وفلان ميدخلش المكان لأن المعلم قال كده، أنا نفسى زى ما قلتلكم الست لولا ما اكتفتش انها تبلغنى إن المعلم بيقول أمشى من المكان، لأ ده بعد ما مشيت كمان اصدقائى وزمايلى اللى كانو لسه هناك عملوا عزومة ودعونى ليها، والهانم كلمتنى وأنا فى الطريق قالتلى إبراهيم المعلم بيقول متدخليش المكان ولا حتى ضيفة.

كل اللى كان بيتقال كان له معنى واحد إبراهيم المعلم بيدير كل حاجه بنفسه وهو راضى عن أوضاعكم الزبالة دى وراضى عن مشاكلكم وهو شخصياً اللى بينكل بيكم، يعنى إذا كان رب البيت بالتنكيل ضارباً فنروح لفين ونشتكى لمين.

عشان كده كتبت وكتبت، ما أنا لو مكتبتش هطق.

بس فى شوية حاجات حصلت بعد كده.. الأولى إن فيه صديق واستاذ ليا اشتغل فى الشروق جديد، ولقيته بيكلمنى كويس جداً عن إبراهيم المعلم، حكيتله اللى حصل قالى متصدقيش دى لولا أكيد كانت بتخوفكم عشان متشتكوهاش لإبراهيم المعلم، طبعاً ماهتمتش باللى بيقوله لأنى طبعاً مشحونة جداً، لكن فجأة من 3 أيام بينما المظاهرات شغالة فى ميدان التحرير، وأنا طبعاً بادعى انى بشارك فيها وقاعده مع أصدقائى فى كافيه ريش، لقيت إبراهيم المعلم داخل علينا ومجموعة من اصدقائه، الترابيزة بتاعتنا كان عليها كام كاتب وإعلامى من اللى يسدوا عين الشمس، فجه الراجل سلم عليهم وسلم عليا على البيعة وهو بيقولى :"إزيك يا بنتى"، هو الراجل ده عارفنى بصحيح وكان بيطلب كل شوية من لولا تإذينى، ولا هو راجل طيب ومحترم زى ما بيقول صديقى العزيز اللى أنا كلمته بعدها أحكيله الموقف من باب الطرافة، فحلفلى إنه قال لإبراهيم المعلم فى حضور ناس كبيرة أوى الحاجات اللى لولا بتقولها عليه، وحكاله اللى حصل معايا، وهوه كان مذهول ومش مصدق اللى بيتقال، وأكد إنه أول مره يسمعه ويعرفه، وإن عمره ما قال للولا ده يمشى وده يقعد ولا حتى ده ميجيش ضيف عند زمايله.

أنا طبعاً بصدق أستاذى اللى نقلى الحكاية على لسان إبراهيم المعلم جداً، لكن برضه مصدقه اللى بيحصل فى بوابة الشروق لأنه كان بيحصل معايا ومع زمايلى، هو ده اللى بقولكم صدقوه ومتصدقوهوش، المعلم لم تثبت إدانته فى اللى حصل لنا، بس برضه عليه مسؤولية زى السياسيين كده فى إن ده كان بيتم باسمه، لكن المهم إنه ميفضلش يتم بالشكل ده.

أنا مبخجلش من الإعتذار .. وممكن أقولكم دلوقتى إنى مديونة لإبراهيم المعلم بالإعتذار، ونشر التدوينة دى ممكن يبقى إعتذار، لكن برضه حد يقوله إن الشروق اللى هو راسها وكبيرها مديونالى أنا وأكتر من 30 زميل باعتذار حقيقى عن 3 سنين من الإهانة والإزدراء والتعسف والتنكيل.

ك. ك

 10 - 11- 2011

ياريت الناس كلها الحاج سعيد.. شكراً

علي مدار أكثر من أسبوع وأنا بحاول إنهاء بعض الأوراق الخاصة بوالدي من احدي المؤسسات الحكومية وذلك بناء علي توكيل عام منه لي.. وطبعا خطوة التوكيل العام دي جت بعد تفكير عميق وخوف أعمق من جانب بابا حبيبي إللي تخيل أني ممكن اعمل زي الأفلام العربية إللي الواد الشرير يستغل التوكيل بتاع أبوه ويشلطه ويخليه على الحديدة.. وكمان بعدها يبيعه الحديدة.. المهم القصة تبدأ من عند هذه المؤسسة الكبيرة إللي المفروض أخلص منها الورق..

الزيارة الأولي.. استقبلني الموظفين وكأني كائن فضائي لعل شكلي خدعهم وظنوا أني طفلة صغيرة.. لكن بطاقتي وتوكيل بابا كان بيخليهم يصدقوا أني كبيرة كفاية.. رغم أني مش رايحة بضفاير.. المهم علي ما أخدت رد مفيد كنت لفيت كل المكاتب رغم أن الإجابة كانت ممكن تبقي من أول مكتب.. لكن أزاي موظف حكومي يريح مواطن قرفان في عيشته أصلاً.. رجوعاً للإجابة إللي أنا عرفتها بطلوع الروح.. وقعت تحت رحمة موظفة.. يعني أنثي.. والواحدة تقع تحت أيد عشماوي ولا تقعش تحت رحمة موظفة مؤنثة زيها.. وحتي يومنا هذا معرفش ايه السبب..

المهم أن الموظف إللي كان معاها فى المكتب.. لقيته ملتحي وبيقولوا له يا حاج سعيد.. ولأني تصرفت بعنصرية ملحوظة تجنبت الكلام معاه.. خوفاَ من أنه يحرجني من ناحية.. عشان الفكرة أن الملتحين أو أصحاب لقب حاج مش بيكلموا ستات عامة.. فواحدة سافرة زي أكيد مش بعيد يرموها من الشباك.. لكن لأن الله مش بيرضي بالظلم وسوء النية.. وجدت دفعة حنان وابتسام من الأستاذ سعيد.. إللي سألني أنا جاية من أين.. ولما لقي ورقي من المحلة تخيل أني جاية من السفر.. فقالي أتفضلي اقعدي.. وانا اعتذرت فأصر بشدة.. وخلاني أقعد في المكتب إللي ممنوع علي المواطنين دخوله لأنه خاص بالموظفين الكبار.. وعشان ربنا يكسفني أكتر.. الحاج سعيد قام بنفسه يخلص لي الورق كله.. لدرجة أني مكنتش مصوره البطاقة فأخدها وصورها لي بنفسه.. كل ده قدام دهشة الموظفين أن رئيسهم بيخلص ورق لمواطنة بسيطة مش جاية بتوصية من حد مهم..

والموظفة إللي حطيت لي كل العراقيل الممكنة والغير ممكنة.. قدام موقف الحاج سعيد.. تحولت من متوحشة إلي أم حنون.. فاستغربت بشدة لما هي جواها إنسانة كويسة كدة وحنونة فعلا ليه بتصدر الوش الخشب والناس مش مستحملة أصلاً..

انتهي الحاج سعيد من الإجراءات إللي المفروض أعملها أنا.. والابتسامة والكلمة الطيبة مافرقتوش لحظة.. تم تحديد يوم الأسبوع إللي بعده عشان أستلم الورق.. ومشيت وسط سلامات ودعاوي الحاج سعيد أن ربنا يسترها معايا ويوفقني..

الزيارة الثانية إللي كانت صدمة.. وصلت في الميعاد المحدد ولقيت أن الورق مخلصش أصلاً.. فجريت علي الحاج سعيد إللي أول ما شافني رحب بيا جدا.. وقالي حمدالله علي السلامة.. وسألني أخبار الورق ايه.. ولما عرف أن الورق مخلصش.. اتنرفز جدااا.. وقلب الدنيا وعرف التقصير جيه من اين.. وأدي أوامر أن الورق يخلص حالاً.. فقالوا له مستحيل ده محتاج أسبوع.. فقالهم والبنت دي مش هتروح من غير ورقها أنهاردة.. بجد بأمانة كنت هبكي لأني حسيت بأبوه فظيعة ناحيته.. المهم أخدني مكتب خدمة المواطنين.. ولله الحق المكتب يشرح القلب لأنهم أصلاً مش بيسمحوا للمواطنين أنهم يقعدوا فيه كتير..

قعدت علي الكرسي أتفرج علي الناس وأيدي علي خدي.. عدي الحاج سعيد عشان يتوضأ لصلاة الظهر.. وشافني كدة.. فدخل وقالي متزعليش الورق هيخلص وهتروحي لبابا بيه إنشاء الله.. وبلاش تكشري كدة.. وسبني وراح يصلي.. وهو راجع قالي تشربي ايه.. قلت له شكرا.. فقالي لأ أحنا لازم نفطرك.. وفعلا طلب لي شاي وبسكويت.. كل ده والموظفين فاكرين أني قريبته.. بس مش قادرين يربطوا الصلة بين الحاج سعيد والمواطنة القبطية دي.. ساعتين بالظبط كان ورقي خلص والحاج سعيد بنفسه جابهولي.. ودعي لي وأنا شكرته بشدة وكان نفسي أسلم عليه يداً بيد.. لكن بصراحة أحرجت.. لكن قلت له ربنا يكرمك يا أستاذ سعيد علي كل إللي عملته معايا.. فابتسم إبتسامه لن أنساها أبداً.. ابتسامة صادقة وحنونة..

شكراً لأنك أحرجتني وكشفت لنفسي سوء نيتي.. وياريت الناس كلها الحاج سعيد

ك. ك
18 – 10 – 2011

هل سيلحق المشير طنطاوي العار بالجيش المصري..!!!

لا أستطيع أن أتخيل أن "الجيش المصري العظيم" صاحب البطولات العظيمة التي يتغني بها العالم، ويشيد ببسالته كل رجل جيش سواء عربي أو أجنبي، يرضي لذاته الذل والهوان والضعف وتشويه تلك الصورة النبيلة من أجل إخفاء حقيقة صادمة مرعبة، مستنداً علي مبدأ "قضا أخف من قضا"، بمعني تزييف حقيقة حادثة واحدة أقل تأثيراً علي المؤسسة العسكرية ككل حتى وأن كان ذلك مقابل محو وتلويث تاريخ عظيم.

عزيزي القارئ أرجو منك مساعدتي في فهم عدة حقائق أو صور التبس علي فهمها، خاصة وأنا لم ألتحق بالجيش ولا أعرف عن التكوين والتسليح العسكري للمؤسسات العسكرية أكثر مما رسمته في امتحان الابتدائية لمادة الرسم عندما طلب مني رسم حرب أكتوبر المجيدة فقمت بملأ الصفحة بالدبابات وكأن الجيش لا يعرف سوي هذه المركبة دون حتى الجنود.

المشهد الذي أحاول فهمه منذ يومين وخلال حالة نفسية سيئة هو مشهد "دهس المدرعة العسكرية التابعة للجيش المصري لمتظاهرين مصريين أقباط" ولا يساورني هذا التساؤل لأني مسيحية، وأحاول إلصاق التهم بالجيش المصري مثلما يروج الكثيرين حالياً، وإنما يشغلني هذا بصفتي مواطنة مصرية أنام مطمئنة علي حياتي وبلدي لأن الجندي المصري المرابط عند الحدود يسهر علي حراستي ويعرف جيداً مهامه، وأهمها الحفاظ علي سلاحه الذي بدونه لا شئ، وعند فقدانه يتعرض للمحاكمة العسكرية.

خرجت بعض الأقلام والمسئولون يبررون حقيقة المشهد ويعلنون أن هذه المدرعة تمت سرقتها من قِبل المتظاهرين وأن من يقودها لا يعرف جيدا كيفية التحكم بها وهو ما جعله يدهس الناس بها، وهو ما أشعل علي الجانب الأخر جو من السخرية والفكاهة من هذه المبررات الساذجة التي لا ولن يقبلها عقل طفل صغير مصاب حتى بخلل فكري، وذلك لعدة أسباب من وجهة نظري بعد الإطلاع جعلت من هذا المبرر إما مستحيلاَ أو نقطة سوداء مخزية ومخجلة ووصمة عار علي جبين مؤسسة عريقة ومهمة كالجيش المصري، وهذه الأسباب هي:

أولا: تعريف المدرعة وفق ويكيبيديا ولأني لا أعرف بالظبط المدرعة التي قامت بدهس المتظاهرين هل هي مركبة قتال مدرعة أم ناقلة جنود مدرعة ، فقررت وضع التعريفين:

- مركبة قتال المدرعة: تعرف كذلك بـ آلية قتال مدرعة وعجلة قتال مدرعة وعربة قتال مدرعة هي عبارة عن مركبة ذات بدن مقاوم لاختراق المقذوفات النارية ومسلحة بمدفع أو رشاش آلي إضافة إلى الأسلحة المساندة، مركبات القتال المدرعة تستخدم أما للنقل كناقلات الجند المدرعة أو للقتال المباشر مثل الدبابات ومركبات المشاة القتالية، ويمكن أن تكون مركبات القتال المدرعة مجنزرة أو مدولبة، تم إدخال العديد من التطويرات المهمة على هذا السلاح وعلى العديد من الأصعدة أهمها السرعة، التدريع، القوة النارية والتصويب، حيث تم تزويد هذه المركبات بمدافع ذات عيارات مختلفة وبمدافع رشاشة وأحياناً بصواريخ قصيرة إلى متوسطة المدى وقاذفات رمانات واللهب، كذلك تم تزويدها مؤخراً بآليات دفاع ضد القاذفات الصاروخية وآليات تحديد أهداف متطورة.

- ناقلة جنود مدرعة: هي مركبة مدرعة مصممة لنقل الجند إلى ساحة المعركة، عادة ما تسلح ناقلات الجند المدرعة بالمدافع الرشاشة فقط بينما تسلح بعض الفئات بصواريخ موجهة مضادة للدروع أو مدافع هاون، وعلى عكس مركبات القتال المدرعة فإن ناقلات الجند غير مصممة للاشتباك المباشر مع النيران المعادية إنما حماية ونقل الجنود إلى ميدان المعركة حيث يترجلون لتنفيذ المهام ويكون للناقلة توفير الحماية لراكبيها من شظايا المتفجرات ومن الكمائن، وتنقسم ناقلات الجنود المدرعة إلى ناقلات مدولبة وناقلات مجنزة ، وبشكل عام فإن ناقلات الجنود تتميز بخفتها وسرعة تحركها لخفة درعها مقارنة مع باقي الدروع ، كما أن بعض ناقلات الجند لها قدرة على اجتياز الموانع المائية بأعماق مختلفة.

ثانيا: المسئول عن المدرعة.. أيضاَ وفق ويكيبيديا

الحظيرة: وهى الوحدة الأساسية ويرأسها عريف إلي مساعد أول، وتتكون من 8 إلي 12 فرداً، مسلحين.

ومن هذه النقط يتضح لنا أن المدرعة ليست عربية فيات 127 أو حتي جيب هامر، يسهل مغافلة صاحبه وسرقتها، لأنها غير قابلة للسرقة لأن ليس لها مالك واحد أو مسئول واحد وإنما من 8 إلي 12 فرد يحرسونها، مثلما يحرسون أرواحهم وسلاحهم، بالإضافة إلي مؤهلاتها الضخمة التي أبرزها السرعة الفائقة والتي لا يمكن أن تتم سرقتها أو حتى محاولة اعتلائها وهي تسير، وأخيراَ التصميم الشكلي لها الذي يستحيل معه تسلقها بسهولة لارتفاعها، وهنا يظهر 3 أسئلة:

السؤال الأول:

هل تمت سرقة المدرعة أثناء وقوفها أمام ماسبيرو في ظل هذه الحراسة وأمام أعين هذه الحظيرة أو الفصيلة أو أي أن كان التشكيل العسكري المرابط بجوارها؟

أن كانت الإجابة بنعم.. فأين كان كل هؤلاء أثناء سرقة هذا السوبر مان للمدرعة، وبافتراض انه كان مسلح، لماذا لم يحاول أي جندي همام من هؤلاء الدفاع عنها حتى لو خسر روحه، فهذه تعاليم الجيش وأوامره، وأن كان تم السيناريو بأن غافل هذا الهيرو كل هؤلاء وتفوق وحده علي حوالي 18 جندي من خير أجناد الأرض، فلابد من الإفصاح عن هؤلاء المقصرين ومحاكمتهم عسكرياً علينا، لأن هؤلاء هم من نثق فيهم علي أروحنا وحدودنا.

أو الاحتمال الأخر وهو أن هؤلاء الجنود كانوا مشغولون عنها بقتل المتظاهرين وسحلهم مما جعل سرقة هذه المدرعة مهمة شبة واقعية.

أو احتمال أخر وهو أن منظر النيل كان خلاب في العصاري مما دفعهم لترك مهامهم للاستمتاع بهذا المشهد الرومانسي علي صوت وابل الرصاص والصرخات.

السؤال الثاني:

هل تمت سرقة المدرعة وهي مسرعة أو حتى تسير بتروي..؟

وأن كانت الإجابة بنعم.. هل يوجد من يستطيع تفسير قدرة شخص "بني آدم يعني من لحم ودم يقدر يتسلق مركبة أهم ما يميزها كما سبق وذكرنا السرعة الفائقة والخفة في الحركة"، إلا في حالة أن هذا الشخص الهيرو الجبار يستطيع الطيران مثل سبايدر مان.

أما عن التساؤل الأخر في حالة نعم، أين كان المسئولون عن هذه المدرعة حيث لا يمكن تقبل فكرة أن مركبة عسكرية بهذه المؤهلات تخلو من شخصين علي أقل تصوير وهما قائد المركبة وجندي على المدفع الرشاش الخاص بها।

السؤال الثالث:

ماذا عن الفيديو الذي يُظهر المدرعة تدهس الناس ويخرج جندي أخر من رأسها ويطلق الرصاص علي المتظاهرين من مدفعه، هل كان أيضا مشارك في عملية سرقة المدرعة ويحاول تجريب الأسلحة الموجودة بداخلها علي أخواته المشاركين له في المظاهرة..؟

وأن كانت الإجابة بنعم.. فلا أجد ما أقوله.

ولكن يظهر سؤال مترتب علي هذه النقطة وهو ماذا عن تقارير وفاة شهداء مذبحة ماسبيرو التي تضمنت الوفاة بالرصاص، وأن الوفاة نتيجة الإصابة برصاصة اخترقت الجسد بصورة طولية، من أعلي الصدر وخرجت من الأسفل، أي مضروبة من منطقة أعلي من مستوي الشخص العادي، بالإضافة إلي خروج الرصاصة من الجسد حيث احتفظت بقوة القذف نتيجتها إطلاقها من مكان قريب جدااااا، مثلما حدث مع الشهيد مينا دانيال.

كيف أصبحت إجابات هذه الأسئلة بنعم، والتي حملت معها العار والخزي لكل جندي مصري نبيل، حيث أظهرت مدي ضعف رجالنا الأقوياء، واستهتارهم بالقيام بواجبهم الوطني، وذلك ليس وفقاً لرأي الشخصي وإنما وفق هذه السيناريوهات التي تساعد العقل علي تقبل فكرة سرقة مدرعة من الجيش المصري بواسطة مواطن أعزل، وهي السيناريوهات التي أرفضها بشدة وأفًضل كثيراَ أن تثبت عدم صحتها، وأن يخرج علينا المشير يُعلن بكل جرأة وقوة عكسها ويقول "لا" لم تُسرق المدرعة، فقائدها هو أحد جنود الجيش، وتحمل نتائج الحقيقة، كرجل جيش عاش كما يقول 40 سنة يخدم مصر وجيشها النبيل.

بالإضافة إلي ظهور رجالنا الأشداء وهم يبكون ويولولن مثل النساء أمام شاشات العالم جراء إصابتهم بإصابات يُصاب بها وبأصعب منها من يلعبون الكرة في الشارع من الأطفال، هل هؤلاء من يقفون في أوجه العدو، ويسهرون الليل في الظلام علي الحدود، أم أن هؤلاء الرجال والجنود انتهي ذكرهم بنهاية حرب أكتوبر، وما نراه الآن دمي يرتدون الزى العسكري، وأيضا ليس وفق رأي الشخصي وإنما وفق ما رأيته من نحيب وعويل من رجال دون خجل لرجولتهم وحياء لبزتهم العسكرية، مهما كان يشعرون من آلم.

وسؤالي الأخير لسيادة المشير..

هل ستقبل هذا العار علي جيشنا عوض الاعتراف بالحقيقة حتى وأن كانت صادمة.. فعار قتل الأقباط بأيدي أخواتهم من الجيش المصري أقل وطأة من عار الاستيلاء علي مركبة عسكرية بواسطة مواطن أعزل.. فهي المعلومة والحقيقة التي ستداولها الأجيال فيما بعد.. لأنها الحقيقة التي سيخرج بها علينا المسئول العسكري عندما سيسألونه عن حقيقة هذه المدرعة..؟

هل سيترك المشير طنطاوي جيشنا المصري يصبح أضحوكة العالم.. ونادرة تتندر بها الجيوش الأخري.. بأن الجيش المصري هو الجيش الذي هزم إسرائيل في حرب 73 بينما سُرقت منه مدرعة من قِبل أعزل فى عام 2011..

ك. ك

12 – 10 – 2011

أيها التويتريون والفيس بوكيون المناضلون.. ياريت تخليكوا في حالكوا بقي

هل مازالت النخبة السياسية مقتنعة بأنها تعرف ما يريده الشعب المصري.. وما يدور في الشارع من حوارات بين المواطن البسيط وقرينه.. هل مازال مناضلي تويتر والفيس بوك متأكدون أنهم يعبرون عن نبض الشارع وهمومه واهتماماته ويعرفون رأيه في الأحداث الجارية وتوقعاتهم المستقبلية..


مع احترامي للجميع وبخاصة المناضلون التويتريون والفيس بوكيون لأنهم سريعي الغضب إذا ما طالت أحد الأقلام نضالهم.. أحب أقول "أنتوا متعرفوش حاجة".. كانت معركة حامية دامية علي تويتر وتعليقات الفيس بوك علي الأستيتيوسات المتنافسة علي نقد العروض الجوية التي شهدتها سماء القاهرة منذ الأمس وتحليل أسبابها.. والإنفراد بفرض عضلات المعرفة والمعلومات الموثقة من المصادر المقربة عن الأسباب الخفية.. وإرسال رسائل موجهه للقوات المسلحة بمعني "أحنا فقسانكوا بقي مهما تعملوا.. حتى لو رميتوا علينا ضفادع بشرية.."..


حلقت الطائرات العسكرية علي ارتفاعات منخفضة ولأول مرة وبهذه الصورة المكثفة التي لم تكن تحدث حتى أيام المخلوع.. والأسباب وراء ذلك لن أزعم أني أعرفها جيداً.. لكني أزعم أني أعرف الشعب المصري إلي حد ما.. فهو شعب عاطفي سريع التأثر وبخاصة بشحن العواطف الوطنية.. وبالفعل استطاعت هذه الطلعات الجوية المستمرة حتى الآن في إحداث الأثر المرغوب منه.. مثل الحملات الإعلانية مدفوعة الأجر لتحسين صورة اهتزت أو تم تشويهها.. وتم تنفيذ هذه الحملات لإعادتها للإطار المرغوب فيه..


لم يبذل أي مناضل إلكتروني مجهود ليعرف ما رأي المواطن البسيط في هذه العروض الجوية.. المواطن الذي سمعته يتباهي بقواتنا الجوية ويتمني لو أن الرئيس القادم أحد هؤلاء الأبطال الذين يقودون هذه الطائرات ذات الصوت المزعج.. المواطن المصري الذي تجمع هو وعشرات لمتابعة الأسراب المحلقة وحساب الوقت بين طلعة وأخري حتى لا تفوته رؤية أحدهما.. الصوت العالي المخيف الذي تحول إلي موسيقي رائعة يهتف لها هذا المواطن البسيط كلما سمعه وشكر الله علي هذه النعمة.. بالإضافة سيل الدعاوي بمباركة قواتنا الجوية وجيشنا العظيم الذي يسهر علي حمايتنا..


المواطن البسيط الذي لا يعرف عن تويتر أو الفيس بوك سوي أنه حديث كل وسائل الإعلام وبرامج التوك شو.. بالإضافة إلي أنه يُقال عنه السبب الأول والمدعم الرئيسي لثورة 25 يناير.. رغم أن أعداد كبيرة ممن شاركوا في الثورة وكثير من الشهداء لم تكن معرفتهم بهذه المسميات لا تتجاوز معرفتنا بالمصطلحات النووية المعقدة.. لم ينزعج من هذه العروض العسكرية مثلما أنزعج التويتريون والفيس بوكيون.. ولم يقضي ليلته في نقد ما حدث ومحاولة تحليله ومعرفة ما وراء الحقيقة.. بل نام هادئاً هانئاً يحلم برئيس قوي يحلق بطائرته ليلاً ليُفزع الأعداء بصوتها ويوفر له نوماً أماناً.. ويستيقظ صباحاً علي صوت طائرة رئيسه وهو ذاهب لقصر الرئاسة.. فيتأكد أن الغد يوماً أفضل..


أيها النخبة السياسية أيها المناضلون الإلكترونيون لقد انشغلتوا بالشو الإعلامي.. والتلميع السياسي.. حتي انفصلتوا عن الشارع المصري.. عن المواطن البسيط بهوة سحيقة تحتاج لسنوات ضوئية لتقترب مرة أخري.. تحول نضالكوا وإهتمامكوا ووعدكوا إلي مجرد كلمات يحكمها عدد الحروف التي يسمح بها تويتر لكتابة التويته.. تركتوا العالم الواقعي وعشتوا في العالم الإفتراضي الإلكتروني.. الذي تصبح فيه النجومية والشهرة أسهل.. تتكلموا علي لسان هؤلاء دون أن تعرفوا ما يريدونه حقاً.. قمتوا بانتقاد هذه العروض رغم أنها نالت رضا واستحسان الشارع المصري..

أيها المواطن المصري البسيط لك الله.. وأيها المناضلون الإلكترونيون خليكوا في العالم الافتراضي بتاعكوا وبلاش تدعوا أنكوا تعرفوا عننا أي حاجة.. وخليكوا في اللاب توب والآي باد والحروف الجوفاء.. والتهليل والتشيير والريتويت..

ملحوظة:
أنا أرفض الحكم العسكري ولا أجد في العسكر الرئيس الأمثل لمصر.. ولست سياسية أو رمز من رموز شباب الثورة فأنا شاركت فيها بصفتي الشخصية.. ولست عضوه في أي ائتلاف بارز.. كما أنني لست أحد نجوم التوك شو.. وبالتأكيد والحمدلله لا أنتمي لجماعة "أحنا آسفين يا ريس".. فأنا لا شئ من هؤلاء.. أنا مصرية ونقطة في أخر السطر...

ملحوظة كمان:
أنا عندي حساب علي الفيس بوك وحساب علي تويتر.. وبعبر عليهم عن رأي.. لكن لا أدعي النضال والبطولة ومعرفتي بهموم الشعب المصري.. وليس لي علاقات وثيقة بالمصادر المهمة في البلد إللي تعرف كل حاجة وبتقول كل حاجة للمناضلين المهمين علي توتير..

ك. ك
6 – 10 – 2011

قرش شرم الشيخ هو من قتل الثوار

بما أن المشير "معندوش معلومات عشان مكنش حاضر"، والمخلوع مبارك "ميعرفش حاجة عشان مكنش حاضر برضو"، والعادلي "مش هو إللي أدي أوامر عشان برضو برضو مكنش حاضر"، وقيادات الشرطة "مش هي اللي ضربت الرصاص لأنها للأسف مكنتش حاضرة"، والظباط "مش هما إللي عمروا البنادق وقتلوا المتظاهرين عشان مكنوش حاضرين مع إللي حاضرين"، فده يؤكد بالدليل القاطع أن محدش كان حاضر الثورة، وكان حلم جماعي، وأن كل المجرمين المتهمين إللي في المحاكمة حاليا وشهود النفي كلهم كانوا بيعملوا "تان" في شرم الشيخ في فيلا مبارك.

لكن في قتلي، وفي شهداء، وفي رصاص، وفي أوامر، وكلها الوحيدة إللي كانت حاضرة، والسؤال هو كمان حاضر مين إللي أدي أمر القتل وضرب الرصاص..؟، لكن للأسف الإجابة هي كمان مش حاضرة، وعليه فقررت أجاوب أنا "بسم الله الرحمن الرحيم.. الإجابة هي أن إللي قتل الثوار فى التحرير وفي محافظات مصر هو القرش الشرير الوحش بتاع شرم شيخ.. فاكرينه!!".. وبالهنا والشفا...

القرش الوحش بتاع شرم الشيخ إللي لغاية إنهاردة محدش عارف هو راح فين، لأن القرش إللي اتقبض عليه أعترف أنه هو مش هو إللي كان بيعض السياح، هو المجرم القاتل صاحب أوامر إطلاق الرصاص علي المصريين وهو برضو إللي عمر البنادق وهو برضو برضو إللي ضربهم، وكمان هو القناصة ايه رأيكوا بقي.



نص التدوينة القديمة بتاريخ 12 ديسمبر 2010:

تعانى مصر مؤخرا من عدة أزمات أهمها هجومات الفك المفترس فى شرم الشيخ ولأن عملى بالصحافة المصرية جعلنى منطقية إلى حد كبير ولماحة إلى أبعد الحدود وأفهمها وهى طايرة وأقرأ اللى بين السطور قدرت أتوصل بذكائى الغير محدود إلى تحليل منطقى لما تمر به مصر..


زادت الأقاويل مؤخرا وغير معلوم السبب الحقيقى لهذه الهجمات الغريبة من قبل بعض أسماك القرش لسواحلنا العزيزة ولكن هناك رؤى وتخمينات ومنها:


1- قروش إسرائيلية أرسلتها تل أبيب لمهاجمة السواحل المصرية فى عملية مخططة لضرب السياحة وجذب السياح من شرم الشيخ إلى شواطئ ايلات الإسرائيلية اللى خلاص مش لاقيه سياح وعايزة تاخد اللقمة الطرية اللى فى بق المصريين


2- قروش إسرائيلية برضك مهى دى الجنسية الشائعة دلوقتى ألقتها طائرة إسرائيلية برضك لتنفيذ عملية مجهولة حتى الآن ونبهت عليهم اللى يتقبض عليه ميقولش أسمه الحقيقى ويقول انهم ضفادع بشرية ألقتهم طيارة ومشيت وسابتهم عشان الطيار مراته عملاله ملوخية وهتبرد.. لكن للأسف القرش اللى تم القبض عليه السلطات مسابتلوش فرصة انه يقنعهم أنه ضفدعة بشرية ومركبة زعنفة الفك المفترس..

3- قروش إسرائيلية _ ومحدش يقول إيه الجديد _ كانت فى رحلة الهجرة الشتوية وبدل ما تدخل إسرائيل دخلت بالخطأ السواحل المصرية ولأن مش معاها بطاقة التموين المصرى فمعرفتش تاخد حصتها من السلمون المدخن اللى نازل جديد على البطاقة فقررت أن لا شئ يعلو على نداء الحياة وهاجمت السياح الأجانب وقالت أهو برضك نعمل بأصلنا ومنهاجمش المصريين اللى أستضفونا فى شواطئهم..

4- بسم الله الرحمن الرحيم نقول برضو قروش إسرائيلية من اليمين المتطرف ومبيعجبهاش الحال المايل فقررت مهاجمة السياح الأجانب فى شواطئ شرم الشيخ لتعلن رفضها لحالة العرى الغير مبرر فقررت تلقين المصريين وشواطئهم وسياحهم درسا حيث تم ملاحظة أن القرش كان مربى ذقنه وفق أحد المصادر الموثوق فيها..

5- مهو مفيش غيرها قروش إسرائيلية شافت أن مستوى السياحة فى مصر مبقاش أد كدة خاصة وأن معظم السائحات اللى بتنزل المية فى الخمسين وأنت طالع فقررت أنها تعلن رفضها والمطالبة بتخفيض سن السائحات والدليل ان السائحات اللى تمت مهاجمتهم مش أقل من 65 سنة وده يدل على أن القرش كان بينقى مش عشوائى وأهوج زى ما اتهموه..


لما كتبت التدوينة دي كنت في حالة إستفزازية فظيعة، لأن المسئولين الحلوين وقتها قالوا إن إسرائيل هي إللي بعتت القروش دي عشان ضرب السياحة، وخلوا المصريين أتلهوا في حكاية إسرائيل وكراهيتهم ليها والأدهي أنها بتبعت قروش كمان، وللأسف المسئولين المصريين زى ما هما مش بيتغيروا حتي لو النظام أتغير، وشغلوا المصريين في حكاية إسرائيل برضو، وتحولت السفارة الإسرائيلية إلي الشغل الشاغل، وتسبتت في محاكمة عدد من المدنيين محاكمات عسكرية، وفي النهاية كلها مؤامرات مدبرة لإلهاء الشعب.

وأظن بقي كدة أحنا عرفنا مين إللي قتل الثوار يا مصريين يا حلوين، لأن السناريو ده مش قديم علينا، احنا بس إللي بننسي، وفي الأخر كلها قروش، وكلها شرم الشيخ، وكلهم مسئولين وحماة ومدافعين عن هذه القروش التي لا تموت ولا تتهم بشئ حتي وأن كانت أفواها لسه دم الضحايا مبردش فيها، وكل لبيب بالإشارة يفهم، عشان حظر النشر بس.

ك. ك
25- 9 - 2011

غلق مقاهي البورصة يفجر كوميديا سوداء علي تويتر

القوى السياسية تدعو إلي جمعة صب الشاي وتطالب القهوجية بضبط النفس.. منقول
تسبب غلق مقاهي البورصة، ومداهمة عدد أخر من مقاهي وسط البلد في حالة استياء عامة، خاصة في ظل تطبيق قانون الطوارئ، وعقب جمعة "لا للمحاكمات العسكرية"، بالإضافة إلي التساؤلات التي تدور حول سبب غلقها والجدوى منه.

تحول موقع "تويتر" خلال ساعات إلي معركة كلامية، ولكنها ليست بمعركة دامية وإنما معركة كوميدية، حيث تباري "التويتريين" في الخروج بالإفيهات الساخرة، والإجابة علي سؤال "هما ليه قفلوا البورصة"، وقمت برصد أفضل التعليقات الساخرة، التي تُثبت وبالدليل القاطع أن المصري هو المواطن الوحيد القادر علي الخروج من المواقف الصعبة التي تواجه حياته وتتسبب في غضبه بكوميديا سوداء غاية في السخرية ومثيرة للضحك بالفعل.

نقلاً عن تويتر:

عال بورصة راجعين هنشيش بالملايين..

يا ابو دبورة و نسر و كاب .. مين هيدفع الحساب .. يا مشير يا مشير مش هحاسب عالعصير..

اشرب يا ابني بسرعه السحلب ... جيش طنطاوي جاي يتسحب..

الإخوان المسلمين : لن نشارك فى موقعة البورصة لأن بعض المشاريب غير متفق عليها..

الظاهر فعلا زى مابيقولوا المجلس كان عايز القهوة عشان يحطها فى الصينية..

بعد حادثة البورصة اتوقع ان نظام مصر مش حيبقى برلماني ولا رئاسي ..... حيبقى فخفخينا..

جمال مبارك كلم رجالته من السجن قالهم "يا اغبيا مش دي البورصه اللي قولتلكم وقعوها..التانية بتاعت الاسهم..

طنطاوي قول لعنان .. بكرة الشيشة بالمجان..

يا برتقان عالشجرة بعييد .. كان في ايدي ليّ .. خده مني عمييد..

في كل ﺷﺎﺭﻉ ﻓﻲ ﺑﻼﺩﻱ ... ﻛﺮﻛﺮﺓ ﺍﻟﺸﻴﺸﺔ ﺑﺘﻨﺎﺩﻱ..

قهاوى يا قهاوى انا بحبك يا قهاوى , قولوا لأمى ما تشيشيش , وحياتى عندك ما تحبسيش..

دى مش غلطتنا .... دي غلطة كل واحد كان ماسك اللي و متبت فيه..

نزل يابنى الشاى فى الخمسينة ..دا الجيش مآنسنا وسايب سينا..

دى خلاص مبقتش عيشة .. اخدوا البيبسى وأخدوا الشيشة..

مصر حرة مصر حرة .. بس الشاي بسكر برة..

المبسم لا يزاال في جيبي..

ممدوح حمزة: كل المشاريب دي على حسابي..

لو الجيش بجلالة قدره عمل "إقتحام" لقهوة يبقي العبور الجاي هيكون ل"الكورنيش"..

عمرو مصطفي :ليبتون وراء اقتحام القهوه والدليل "ليبتون..تقدر علي كده" ..لا تعالي بقي..

المجلس العسكري يقرر الأستفتاء علي 12 مادة,و4 عناب,و2 شيشة تفاح..

بيقولك الهجوم ع القهوة كان بسبب ان اتنين بيلعبوا شطرنج وواحد موت العسكرى..

خبي يا حمو الفخفاخينا للعساكر تضرب فينا..

من لم يكمل قهوته, لا يملك حريته..

القوى السياسية تدعو الي جمعة " صب الشاي " و تطالب القهوجية بضبط " النفس..

الي المشير طنطاوي اديني بورصة تانية..

بتاع الشيشة: المجلس ده مايجيش غير ب "لي" الدراع..

يالي بتشرب شيشه تفاح سامي عنان مش مرتاح..

انا مش حاسس بالتغييير .. شييل الشييشة يا عم سميير..

هنرددها جيل ورا جيل, مش بنحب الشاي تقيل..

ك. ك
21 – 9 - 2011

مذكرات مبتئسة في عالم الصحافة.. ج3

الجزء الثالث: كوكي الصحفية اللامعة.. بخ

وبالفعل يحيا العدل.. يحيا العدل.. كلمونى.. ولأن أختى العزيزة هى أكثر قرائى إعجاباً بيا.. وكانت وقتها الوحيدة.. لأن أخويا كان بيتخنق مني.. وماما بتنام في النص.. أو بتزعق لي لو حست أني بتكلم عن أي حد فيهم في القصص.. بس منكرش انها كانت بتشجعنى جدااا.. وأخيراً بابا إللي كان بيبقي معجب جداااااا باللى أنا كتبته في الأول وتبدأ مرحلة النقد لتغيير كل إللي كتبته عشان بابا شايف أن كدة أفضل.. بس برضو هو ليه الفضل أني حبيت القراية جدااااااااا.. وأني كتبت.. شكرا بابا.. وشكرا أسرتي الكميلة..

المهم قررت أختي مشاركتى طريق الكفاح وحضور جلسات التأهيل الصحفى كما أعتقدت وقتها.. لكنه كان كورس ثقافى.. رغم أن أسمه فى الإعلان مكنش كدة.. ما علينا.. لن أنكر حقيقة أنى أستفدت منه ثقافيا.. ودفعنى أن أقرا كتير وقتها فى الفلسفة وتاريخ الشعوب وغيرها.. وكمان جت لي الجرأة لأول مرة أقرأ قصة قصيرة من إللي أنا بكتبهم قدام الناس.. طبعا أتلخبطت كتير.. وعرقت ووشي بقي شكل الطمطماية.. لكن أختي الحلوة كانت بتبص لي وتشجعني بعنيها أني مخفش واكمل.. والغريب أن قصتي أثرت في كل الموجودين ومنهم إللي عنيه دمعت.. صراحة حسيت كدة أني عملت أكبر إنجاز في حياتي.. لأن الدموع هي مقياس نجاحي..

لكن وبرغم كل الحاجات دي.. والتشجيع أني أكتب.. إلا أن تجربتى القصيرة بهذه الجريدة خيبت أمالى كلها فى عالم الصحافة.. وفقدت الأمل فى أنى أصبح صحفية.. واخد الكارنية.. أصل حلم كارنية نقابة الصحفيين ده بيكون الهدف الأول إللي الصحفي بيجري وراه.. المهم فقدت كمان رغبتى فى إنهاء هذا الكورس الثقافى.. خاصة بعد ما قدمت شغل كتير فى محاولة لنشره بصفحة الشباب..

لكن كنت بتصدم لما بلاقى مواضيع عبارة عن نسخة من موسوعة ويكيبيديا أو مواضيع أرشيفية نازلة فى مساحات كبيرة ومتكررة كل أسبوع بعناوين مختلفة والمضحك أنها بتحمل نفس الأسامى.. يعنى صاحب الموضوع مكلفش خاطره يعمل سيرش على النت ويجيب موضوع تانى من ويكيبيديا برضو عشان ميتعبش أوى.. هو كل اللى بيعمله بيغير العنوان.. ورئيس الصفحة مبيكلفش خاطره يشوف ده متكرر ولا لأ.. لكن كتر خير مخرج الصفحة اللى كان بيرسمها هو اللى بيتعب لأنه كان بيغير مكانها كل مرة ويمكن يكون بيغير الصورة.. وكتر خير سكرتير التحرير اللى كان بينسى المواضيع اللى قبلها من رؤساء الصفحات ونزلها كل مرة..

أنا بقى كنت بتغاظ أكتر عشان كل ما ابعت موضوع يقولوا لى هينزل الأسبوع الجاى.. واستنى.. وبابا يستنى.. وماما تستنى.. وأختى قارئتى الشغوفة تستنى.. رغم أنها قرت الموضوع قبل ما ينزل.. بس هى مستنية تشوفوه باسمى فى الجورنال.. وأصحابى اللى قلت لهم هينزل لى حاجة الأسبوع ده يستنوا.. وينزل الجورنال.. والموضوع مينزلش..

ولما سألت بكل جرأة هو انتوا ليه مش بتنزلوا لى مواضيع.. ده فلان ده مثلاً كل مرة بتنزلوا له وكل كلامه من على النت وويكيبيديا.. إنما أنا بقرا كتب وبعمل سيرش عشان أدعم اللى بكتبه.. وكان ردهم هو المسمار الأخير فى نعش حلمى الصحفي.. لأنهم قالوا لي وبكل ثقة وكأني متخلفة.. يعني سؤال أهبل من شخصية تافهه علي رأي القرموطي.. إللي بينزل لهم مواضيع دول أقارب ومعارف رئيس التحرير ورؤساء الصفحات.. وهما بس اللى بينزل لهم..

وبنفس البلاهة سألت تاني يعنى ايه!!.. التكوين الصحفى ده بمبة.. والصحافة الجادة الحقيقية أفتكاسه.. وأنا موهومة وجيت العاصمة على سراب.. ولقيت أنها مش فارقة بقى.. بلا كورس بلا ثقافة بلا هم وسفر كل أسبوع عشان أحضر الحلقة النقاشية.. لأن في الأخر مش هيتنشر لي حاجة.. وأن الجريدة دي هي حلمي ومفيش غيرها في مصر تاني.. أوووبس.. سوري يا جماعة... أقصد مفيش في القاهرة غيرها..

والصحافة طلعت لا هي القلم الحر والإبداع والمصداقية والموهوبة ولا حاجة من الكلام الجميل ده.. واسمي إللي كان بيلعلط وحواليه فرعين نور في أكبر الصحف في أحلامي راح وأخده الوبا.. وقررت أن أعود منهزمة.. أجر الخيبة إللي بالويبة.. لكن..

ك. ك

4 – 6 - 2011

ملحوظة: كل الأحداث التي تم ذكرها حقيقية.. وما تمنيت أن يحدث قمت بتوضيح أنه كان حلم أو أمنية ولم يقع بالفعل.. كما أن اسماء الأشخاص وبعض الأماكن قمت بتغيرها لأسباب شخصية..

"الحمار" البني آدم..!!

نعم إنه هو "الحمار البني آدم" والذي يختلف إختلافاً جذرياً عن "البني آدم الحمار".. لأن الأخيرة تعتبر شتيمة أو صفة بمعني التناحة أو قلة الذوق أو غيرها من الصفات.. ورغم ذلك أنا لا أقبل بأي شكل من الأشكال أي إهانة لهذا الكائن الرائع "الحمار".. لأن لو البني آدم أخلاقه وحشة وطباعه أوحش ده مش معناة أنه حيوان.. لأن الحيوان خُلق ليعيش بالفطرة.. فأي أن كانت مدي سوء فطرته.. إلا أنه لا حيلة له.. فلا يمكن لومه.. إنما البني آدم مختلف.. لذلك من الإجحاف والظلم تشبيه البني آدم الضايع بأي حيوان..

وعشان نكمل التدوينة دي علي خير.. وتفهموا حاجة من إللي أنا عايزة أقوله.. لازم نتفق علي حبة حاجات كدة.. أولاً أن الحمار أكثر الكائنات تحملاً.. الجمل ممكن يتحمل لكن لو قلب وشه.. بيقلب إللي عليه وأحياناً بيكون قاتل.. إنما الحمار الكميل مش بيعمل كدة.. بالعكس بيفضل ماشي لغاية ما يقع علي الأرض خالص.. ثانياً الحمار ممكن يكون غبي.. لكن ممكن يتبرمج.. يعني مش هيحفظ غير الطريق إللي كل يوم صاحبه بيمشيه فيه.. ولو في حال أن صاحبه ضاع مثلاً.. الحمار مش ممكن يضيع.. هيرجع المكان إللي هو حافظه..

ثالثاً الحمار طيب ووشه تحسه دايماً مبتسم.. لو مش متفقين علي دي معايا عدوها.. أنا عامة بشوفه كدة.. رابعاً مهما ينضرب عمره ما بيرد الضربة.. خامساً صوته أينعم مش أد كدة.. لكن هو حسيس مش بيطلعه غير كل فين وفين..

رجوعاً إلي "الحمار البني آدم".. وده المقصود بيه الحمار الصغنون إللي عايش جوة كل واحد فينا.. أيون كل إنسان حسيس طيب وغلبان.. جواة عايش حمار كميل مستخبي كدة مش بيطلع حتي لصاحبه.. لكن هو موجود.. ويجوز في مننا كتير جواهم زريبة حمير ومش عارفين..

لما الإنسان يكون في سؤال محيره جداً بخصوص إنسان تاني.. سواء كان الإنسان التاني ده وحش او حلو.. والإجابة قدامه وميشوفهاش وكل الناس شيفاها يبقي لامؤاخذه "حمار".. من غير ظرظرة كدة.. يبقي "حمار" عشان هو مستني كل الفرص تثبت له مثلاً عكس إللي هو شايفه وكل الناس شيفاه.. أو لو مثلاً بني آدم أتعود يقبل أنه يبقي دايماً مجروح يبقي برضو وبكل إحترام "حمار".. لأنه أدي للآخرين أحقية جرحه دون الإلتفات لآلمه.. ويوم يجر يوم لغاية ما أتعودوا يركبوه وهو مطيع وآليف.. وأقصي حاجة يعملها أنه يقعد يندب حظه.. ويقول ليه ياربي خلقتنى "حمار"..

لما بني آدم يبقي متمسك بحد والحد ده يسيبه ويمشي.. وهو يرجع كل مرة لنفس العنوان.. وكل مرة الحد ده برضو يمشي.. يبقي وبدون أدني شك "حمار".. لأنه شايف وعارف أن الحد ده مش عايزه لكن مستكبر يقولها.. لما إنسان يبقي علي طول مبتسم حتي في وش إللي بيهينوه وميفكرش ولا مرة يقولهم ليه بتعملوا كدة.. يبقي وبكل آسف "حمار".. لأن التواضع والرقة والتحمل مش معناه أن البني آدم يبقي ملطشة..

لما إنسان يبقي مجروح ومتآلم وميتكلمش لأنه شايف أن صوته وحش ومحدش هيسمعه.. أو لأنه مستني حد معين بس هو إللي هيتحمل صوته.. يبقي ساعتها صاحب جائزة أوسكار لأكبر "حمار" لأنه مش بيبص كويس حواليه.. عشان في كتير بيقدموا لنا حب وأحنا مش واخدين بالنا أو أتعودنا أنهم يعطونا.. وأحنا حتي مش بنحاول نستغل الحب ده كويس..

الحمار كائن جميل وصبور ومتحمل.. ولو كل واحد جواة حمار صغنون.. أظن الناس هتتعامل مع بعض بإحترام أكتر.. لأن يمكن أحنا مش عارفين نحترم آدميتنا.. وآدمية الأخر.. لكن يمكن نقدر نشفق علي "الحمار" إللي عايش جوة كل واحد فينا..

ك. ك
13 – 9 – 2011

مذكرات مبتئسة في عالم الصحافة.. ج2

الجزء الثاني: كنتاكي مش كائن فضائي

وقررت أنا مبتئسة غزو مصر زى ما بنقول أحنا بتوع القرى.. رغم أننا مش قرية.. احنا مدينة.. أعظم مدينة غزل وفوط وكوافيل.. لكن أكتشفت لما جيت هنا أن مصر دى أسمها القاهرة.. ياه ده أكننا مكناش عايشين يا جدعان.. مصر اللى بنسافرها رحلات دى مع المدرسة.. اللى فيها الهرم وحديقة الحيوان وكنايس مصر القديمة اسمها القاهرة.. طيب ما انا عارفة ياللى بتتريقوا عليا.. أن اسمها القاهرة.. بس مجازا الناس بتقول مصر.. لكن هنقول ايه عقدة سكان المدينة.. اللى طلعوها عليا..

وكانت البداية درس الجغرافيا واللغة وأن القاهرة مسمهاش مصر.. عيب الناس تضحك عليكى هنا ويقولوا لك يا فلاحة.. طيب ما انتوا اللى بتقولوا إني فلاحة أنتوا برضو إللي بتحذرونى.. يبقي بتحذروني من مين بقى.. عقدة المدينة اللى واكله سكان القاهرة.. أن أى حد جاى يشتغل فيها يبقى فلاح وقروى ومش لاقى ياكل وبيجري على ولايا وأيتام.. وكنتاكى وماكدونالد دول كائنات فضائية أول مرة يسمع عنهم مش مثلا أول مرة ياكلهم.. لأ أول مرة يسمع عنه..

ده غير أن القروى ده مش بيفهم وبيتكلم من ودنه مش من بقه زيهم.. ولهجته يع يع يع بلدى أوي.. طيب ياريت كنا فلاحين وعندنا أرض.. هو فى أجدع من الفلاحين.. ده ثورة 23 يوليو هذا الإنقلاب العسكري.. انقلب عشان كرامة المصري عامة.. وفقراء مصر وفلاحيها بخاصة.. مبارك نفسه قعد 30 سنة يقول الفلاح هو إهتمامى الأول.. عشان ياكل بعقول المصريين حلاوة.. محدش طلع يقوله يع يع يع الفلاح ده ياي خالص.. ليه متخليش برنامجك الإنتخابي.. الفرافير أولاً.. عايزين ايه تانى بتوع العاصمة عشان يعرفوا أننا الفلاحين زى ما هما بيقولوا بابا مبارك بيحبنا أكتر منهم..

وبعدين ماكدونالد ده ايه مش شاطر ومشطور وبينهم حتة لحمة وشوية سريس ولا ورقتين كرنب أهو أي حاجة خضرا وخلاص.. ايه الجديد يعني.. شوية الصلصلة إللي بيسموها الكاشتب مثلاً.. مع إحترامي للكاتشب.. بس أصل أحنا بنقلب الحروف من وجه نظر القهراويين..


رجوعا لليوم الموعود.. ماما وأختى وقريب لينا.. نزلوا معايا العاصمة.. غزو الفلاحين للقاهرة وتم بحمدالله الوصول إلى مقر الجريدة العظيمة مع كل الأحترام والتقدير.. لكن أنا مكنتش متخيلاها كدة.. أصل فى التليفزيون بيجيوا الجرايد بشكل تانى خالص.. لأنى تخيلت مكتبي.. وهو عليه صورة الأسرة السعيدة.. وصورة الكلب اللى احنا مجبنهوش.. والمج والأقلام اللى بريش.. وكم بوستر كدة علي الماشي على الحيطة اللى ورايا.. لكن إللي شفته خلاني أفكر لو ليا كرسي تبقي فلة أوي وعال العال..

ما علينا.. أستنيت ميعادى.. ياه كل دول شباب عايزين يتثقفوا ويتعلموا يبقوا صحفيين.. دى بجد حاجة مشرفة.. يارب بس يقبلونى.. وكان لقاءاً مثمراً.. وقالوا لى هنكلمك بإذن الله.. ومنساش أبدا كتاب الإنسان بين الجوهر والمظهر للعالم إريك فروم وهو كتابى المفضل وأول حاجة حطيتها فى شنطتى وأنا جايه العاصمة.. وتأثيره على من أجروا معى المقابلة لما عرفوا أنى قريته وأنه الكتاب المحبب لقلبي..

تركت العاصمة وركبت الأتوبيس للعودة إلى عملاقة الغزل والنسيج.. وتمر الأيام وأنا قاعدة مستنية الأتصال..

ملحوظة: كل الأحداث التي تم ذكرها حقيقية.. وما تمنيت أن يحدث قمت بتوضيح أنه كان حلم أو أمنية ولم يقع بالفعل.. كما أن اسماء الأشخاص وبعض الأماكن قمت بتغيرها لأسباب شخصية..

ك. ك
4 – 6 - 2011

مذكرات مبتئسة في عالم الصحافة.. ج1

الجزء الأول: اكتشاف الموهبة

أعرفكم بنفسى الأول أنا الآنسة مبتئسة.. أيون أسمى كدة أبويا وأمى لما أتولدت سمونى كدة.. هو مش كدة أوى.. بس مشوها كدة.. أبلغ من العمر 25 عاما.. أيون ولسه آنسة الحمدلله ايه المشكلة يعنى..؟.. يعنى سبتوا مبتئسة ومسكتوا فى آنسة.. طفلة عادية.. مش عادية أوى بس مش هى محور مذكراتى حاليا.. بس يكفينى أقول إنى كنت سبب أذية دايماً لأخواتى لقدراتى الفائقة على الإقناع والتمثيل.. أقنعهم يعملوا البلوة.. وأمثل على أبويا وأمى دور البريئة..

مراهقة فاترة زى معظم مراهقين المدن الصغيرة لا تخلو من مناوشات خفيفة.. فترة جامعية أقل من العادية.. بدون مغامرات تماما.. بدون محاضرات تماما لأنى مكنتش بروح الكلية غير فى الأمتحانات.. وبالنسبة لتسليم الأبحاث كانت أختى الكبيرة هى اللى بتتولى المهمة دى.. وده لعجزى وفشلى التام فى انى أصحى من النوم بدرى.. سبحان من كان بيدينى قوة أنى أصحى أروح الأمتحانات.. ربنا كبير.. بالطبع كانت فترة بدون أصداقاء جامعيين.. ماعدا صديق منذ الصغر بمثابة أخ دخل الكلية نفسها معايا.. وعادة كنت بستغله أنه يجيب لى ملخصات المواد.. أو أنه يعملهالى.. حتى لما دخلنا قسمين مختلفين كانوا هو برضو اللى بيعملى الملخصات.. شكرا صديقى رغم أنها متأخرة أنا عارفة..

حلم الصحافة يراودنى بعد ما أخدت المركز التانى فى كتابة القصة القصيرة فى السنة الأولى بالجامعة.. والمركز التانى برضو فى العام التانى.. قلت لنفسى ما أنا تمام فى الكتابة أهو.. عليا وعلى الصحافة.. ويا بختك يا مصر بقلم زى.. مبقاش ورايا حاجة غير أنى أكتب مقالات أقصرهم كانت بتبقى 700 كلمة.. ولازم وحتما أقراها على الأسرة.. ويا ويلهم لو أنا قررت أعدل أو أضيف أو أحذف منها.. لازم يتجمعوا كلهم مع كل مرة يتم تنقيحها.. لكى الله يا أسرتى..

اخدوا من كدة 3 سنين كتابة مقالات وقصص قصيرة.. حتى القصص كان لازم أقراها لهم.. ولأنى مبتئسة.. فأن كل القصص اللى كتبتها فى الوقت ده كانت متختلفش كتير عن أسمى.. ولو مرة كتبت واحدة وقريتها وملقتش الدموع على خدودهم.. لازم اسهر عليها لغاية ما تبقى كئيبة وحزينة وأقراها تانى.. الاقي برضو حنفية عينهم منقطتش حتى.. وعلى هذا الحال... لغاية ما ألاقى الأبتئاس والدموع.. أتنهد وأحس أن المهمة تمت على أكمل وجه.. أرحل بورقى والأبتسامة من الودن للودن.. وسيباهم يمسحوا فى دموعهم...

وفى يوم مفترج.. سنة 2007.. قريت فى جورنال ما إعلان قبول المتدربين الجدد.. ولأن بابا كان شايل الزيرو من التليفون عشان فواتير الموبايلات كانت كبيرة.. كلمته بسرعة فى الشغل وقلت له حلمى يا بابا هيتحقق خلاص.. بس واقف على إتصال مباشر وأنت شايل الزيرو.. هات لى بقى كارت وأنت جاى.. ولأن بابا حبيبى.. زى ما متعودة أقوله.. وزى ما هو بيتريق عليا وبيقولى من صغرك بتعرفى تاكلى بعقلنا حلاوة.. جاب لى كارت فتح الزيرو..

جاب لى بابا كارت فتح الزيرو.. وأتصلت بالجورنال عشان أكلم المسئول.. وخدوا بقى على الأنتظار وسماع الموسيقي بتاعت العربيات إللي راجعة للخلف عمالة تعيد نفسها والواحد خايف يبعد السماعة لحظة عن ودنه.. تبقي هي اللحظة المهمة.. وكأنه فيلم أكشن خايفة أضيع منه حتة.. ده غير البنت إللى علي الإستقبال وعادة بتاكل لبانة فمش بتسمع حد ولا حد بيفهمها.. يا سيتى يا حاجة أنا بتكلم من كارت وممكن على ما تيجى اللحظة الموعودة ويرد الراجل عليا الكارت يفصل.. لكن تقولوا لمين.. لا حياة لمن تنادى.. وكأنى بتصل وقتها برئيس تحرير الأهرام.. مع إحترامى الشديد ليه أنا مش بتريق.. بس أصل حتة الذات دى عند الصحفيين صعبة شوية.. وده اللى أنا اكتشفته وهقوله لاحقا.. المهم فين وفين لما رد عليا.. وده مش من أول مكالمة طبعا.. لأني كلمت البنت إللي بلبانة وسمعت الموسيقي الرخمة المستفزة لما ودني شتمتني..

تعالى يوم كذا عشان نعملك مقابلة.. ياه أجمل كلمات سمعتها على الإطلاق.. باب المجد والشهرة والصحافة أخيرا أتفتح لى.. مش معقولة يا ربى ده لما هيقروا اللى انا كتباه ده مش بعيد يعينونى رئيسة صفحة ويدونى الكارنية.. ده اللى أنا بكتبه بيخلى ماما وبابا يعيطوا.. تخيلوا بقى لما بتوع الجورنال يعيطوا.. حياة من الدموع غير متناهية.. وكأن مقياس النجاح عندى هو بكم المناديل اللى الناس بتستخدمها بعد ما يقروا أعمالى الفذة.. وطبعا بعد محايلات شديدة أنى أبعتلوا عينات من شغلي يقراها ويقيمها عشان تتنشر فى صفحة الشباب.. الراجل وافق على مضض.. وحتى الآن مش عارفة ليه التناكة.. رغم أنهم بيقولوا أن الصحفيين بيحبوا يقروا كتير.. خاصة المتخصصين في الأدب والثقافة.. لكن طلع لا دول ولا دوكهم بيقروا أصلاً..

نزلت جرى وطبعت وصورت كل أعمالى.. وبعتهالوا.. وحتى يومنا هذا لا أعرف هل وصل الطرد.. أم أنه وصل وأطرد.. لكن اللى أنا فكراه كويس أن الخوف والقلق اللى أصابونى بعد ما بعت شغلى كان مطير النوم من عنيا.. أزاى أبعتله كل شغلى من غير ما أسجله فى الشهر العقارى.. أو أى كان اللى بيعملوه عشان حقوق الملكية الفكرية.. ياه ممكن بكرة أصحى ألاقى مقالة أو قصة ليا مكسرين الدنيا وأسمى مش عليه.. بنات أفكارى.. ياه أزاى أبعتهم كدة من غير ما أمن عليهم.. قلمى هيسامحنى أزاى على الجريمة دى.. وقعد الخوف ده ياكل فيا لغاية ما أكتشفت أن بنات أفكارى.. مازالوا بكر.. ومحدش سلم عليهم حتى.. يعنى يا ريتنى قلت فى نفسى كنتي سبيهم يمسكها يا فوزية.. كان يمكن تتنشر حاجة.. ما علينا...

وجاء اليوم الموعود.. وقررت أنا مبتئسة غزو مصر ....

ملحوظة: كل الأحداث التي تم ذكرها حقيقية.. وما تمنيت أن يحدث قمت بتوضيح أنه كان حلم أو أمنية ولم يقع بالفعل.. كما أن اسماء الأشخاص وبعض الأماكن قمت بتغيرها لأسباب شخصية..

ك. ك

4 – 6 - 2011